Ka Nonanona, Volume I, Number 5, 31 August 1841 — Page 17
KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.
Buke 1. HONOLULU, OAHU, AUGATE 31, 1841. Pepa 5.
KAHI MELE.
HOAO HOU.—TRY AGAIN.
1 Eia kau e malama'i,
Hoao, hoao, hoao hou.
Ina loaa ole mai,
Hoao, hoao, hoao hou,
Ina pela wale kau,
Ina hooikaika mau,
Lanakila; mai makau,
Hoao, hoao, hoao hou.
2 'Kahi, 'lua, hoka nae,
Hoao, hoao, hoao hou,
Ke manao e loaa mai,
Hoao, hoao, hoao hou.
E noonoo, a noonoo hou,
E halalo iloko ou
Loaa ole, mai poho,
Hoao, hoao, hoao hou.
3 Hoao hou, a paakiki,
Hoao, hoao, hoao hou.
Aole emo, loaa mai;
Hoao, hoao, hoao hou.
Loaa no ke imi mau,
Pela no na mea a pau,
Ina no e hoomanao,
Hoao, hoao, hoao hou.
LAIANA.
HONOLULU, AUG. 23, 1810.
E na hoahanau ma Wailuku,
Hookahi makahiki i hala ae nei o ko kakou noho kaawale ana, aole nae pau iki ko'u aloha ia oukou, ka poe e noho pono ana iloko o ko kakou Haku. O ko'u kino, eia no ia ma Oahu nei, o ko'u manao nae, na holo pinepine io oukou la, e hoolauna pu me oukou. A i ko'u lohe ana i kela manawa, i keia manawa, i ko oukou noho ana a me ka oukou hana ana, ua olioli kekahi manao a ua ehaeha kekahi manao. Hauoli maoli au i ka hooikaika ana, noho haahaa ana, i ka hipule ana a me maemae ana o kekahi poe o oukou; a ua eha loa ae nei kuu naau me ke kaumaha i ka hana hewa ana a kekahi poe ekalesia.
E na hoahanau, ina i pau ko oukou mau hale i ke ahi, a me ka oukou waiwai i ka haoia; a pau loa paha ko oukou mau kino i ka mai, a make i ka pololi, aole o'u kaumaha nui wale i keia mau mea; no ka mea, he mau pilikia pau koke wale no ia; aka, o ke kipi maoli ana o kekahi poe i ke Akua, me ka hoole i kona berita laa, a me ka hoonaukiuki ia ia iloko o kona hale iho, he mea kaumaha maoli ia. Ina i haule ilalo a pio loa na hoku o ka lani, he mea uuku ia i ka haule ana o ka uhane hookahi iloko o ke ahi pio ole. O ka waiwai o ka uhane, na wai e helu? Aka, ea, mai kahaha loa a kulanalana ko kakou manao, i keia hana hewa ana a na hoahanau. Aole ia he mea hou; mai ka wa ia Kaina a hiki wale i keia wa, ua hanaia pela, a e mau loa ana paha pela,
He hoahanau o Kaina, ua hoohiki oia i ka inoa o Iehova ma ka mohai. He poe hoahanau wale no o ka Iseraela, ka poe ohumu ma ka waonahele, e hoi hope i Aigupita, a hoomana kii no hoi, a me ka pakike aku ia Mose; he hoahanau o Iuda Isekariota, ka mea kumakaia ia Iesu, a me Simona, ke kilo; aole nae he mau hoahanau oiaio keia a pau loa. Aole i loaa ia lakou ka uhane o Kristo; aole mihi io, aole naau hou, aole manaoio, aole makau i ke Akua, aole nae kohu pono, iloko o lakou. Pela no na hoahanau hana hewa ma Wailuku a ma Hawaii nei a puni.
I ko'u manao, ea, o ke kumu keia o ka haunaele pinepine o na ekalesia o Hawaii nei, o ke komo ana o na hoahanau me ko lakou naau kahiko. Ua hooikaika lakou me ke kamailio pinepine me na kumu, ua loaa ia lakou ka pule, a me ka bapetiso ana, a me ka noho iloko o ka ahaaina a ka Haku, a me ka inoa hoahanau; me ka naau kahiko wale no nae, aole wahi naau hou