Ka Nonanona, Volume I, Number 6, 14 September 1841 Edition 02 — Page 21

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.
Buke 1. HONOLULU, OAHU, SEPATEMABA 14, 1841. Pepa 6.

KAHI MELE.
HOOHIAMOE KEIKI. - SLEEP BABY SLEEP.

1 Hana maikai,
Na keiki makamae,
Ma keia kula kamalii,
I loaa mai ke akamai,
Hana maikai.

2 Hana maikai,
A nana pono mai,
He hana nani ka oukou,
Mai walaau a naaupo,
Hana maikai.

3 Hana maikai,
'Na hora kula nei,
Ke nana nei ke Akua mau,
I na haumana nei a pau,
Hana maikai. LAIANA.

Honolulu, Augate 17, 1841.
Aloha oe e ka Nonanona,
          He hoalauna maikai oe; no ka mea, ua hai mai oe ia makou i na mea hou i puka mai ai; i na mea hoi e pono ai ke aupuni.
          Eia mai kekahi mau mea a makou i ike ai ma Koloa, Kauai. O na haole i hanai enuhe kilika, ua pau lakou i ka haalele ia hana. A ua pau ka ilima i ka uhukiia, kakaikahi wale no i koe.
          Eia paha ke kumu o ka haalele ana ia hana. Aole ulu nui ka ilima ma ia wahi; aole hoi maikai loa na lau. O ka la kekahi mea e ino loa ai ka lau; o ka makani kekahi.
          Eia hoi kahi pilikia o lakou, ua hakalia ka hoolaha ana o na enuhe ano maikai.
          Nui loa na hua, a puka liilii mai na enuhe, kakaikahi i ka la hookahi. No keia mau mea, haalele na haole i keia hana, a pau lakou i ka lilo i ka mahi ko.
          Eia hoi keia. Ma ka he bedoma mua o Iulai, pau na kanaka hana i ka haalele i na haole; hapa loa i koe. Eia ke kumu o ka haalele ana. Ohumu lakou i ka uku. He hapawalu ia no ka la hookahi ma ke dala pepa; koi mai kahi poe i hapalua no ka la, a o kekahi poe i hapaha.
          Aole paha lakou i noonoo pono i ka na haole uku ana 'ku i na 'lii no lakou, i kaawale ka hookupu a pau loa, a me ka waiwai i lilo i ke kukulu hale no lakou. Malia, ua noonoo paha lakou i keia wa; no ka mea, ua pau lakou i ka hoi hou i ka hana e like me mamua.
          Eia kekahi; nui ka poe makapo ma Koloa. Mai Wahiawa a Kipu he 21 makapo. A he 20 paha ike powehiwehi. Aohe nui loa na kanaka o ia mau aina. 2000 paha, emi iki paha.
          I keia mau malama, ua mahuahua ka poe huli i ka Palapala Hemolele, a me ka hele pinepine i ka halepule e hoolohe. Ua imi paha kekahi poe i ka waiwai pau ole i ka lani. Pela ka manao o na hoahanau.
Na P. J. KULIKA.

Kaluaaha,, Iulai 22, 1841.
Auhea oe e Limaikaika,
          Eia makou ke noho nei ma ko makou mau hale oluolu ponoi, a mawaena hoi o ko makou poe kanaka aloha. Ua lohe oe i ko makou ee ana i ka moku i ka po akahi. Holo mai la makou; aole pono ka holo ana, no ka mea, ua mama ko lalo o ka moku. Hoao wale ae la makou e holo a i ke ahiahi o ka po elua, aole hiki, alaila hoi aku la makou a moe i Honolulu, a ahiahi ae la o ka po ekolu, ee hou mai la makou a holo pono mai la no, a i ka po alima ahiahi pae ola mai makou me ka pomaikai. Kanahakumamalima hora makou ma ka moana.
          I ko makou noho ana ma Honolulu, noho malie no na hoahanau. Aole haunaele, aole i loheia ua haule kekahi. Kaumaha no ka manao o na makamaka o makou i ka lohe, ua mai ane make Hikekoke wahine. A i ko makou noho loihi ana kokoke pau ko lakou manao e ike hou mai ia makou. Nolaila i ko lakou ike ana i ka hae keokeo ma ka moku, hikilele ka manao a uwe nui ia makou.
          Eia kekahi ua make na hoahanau eha ia makou e noho kaawale ai. O Aberahama ka inoa o kekahi. I kona wa i ola ai he kanaka ilihune a he mai a he nawaliwali. Ehiku ae nei mau makahiki a keu o kona noho ana ma ka ekalesia, aole oia i hihia. Eia kona mea kupanaha, o ke aloha nui i na uhane o na kanaka. Pinepine loa kona hele ana manae a malalo a ma kahi kokoke no hoi, e pule pu ana me ka poe hewa, a e koi ikaika ia lakou e huli ma ka pono o Iesu.