Ka Nonanona, Volume I, Number 7, 28 September 1841 — Page 26

26 KA NONANONA. [SEPA TEMABA,

No ke aha la? Aole anei no ka makemake nui o ka naau i na mea o keia ao, a me ka hoowahawaha i na mea o ko ke Akua aupuni?
          Pela wale no ma ka lealea, ka hanohano o ke kino, ma ka ai, ka ia, a me na mea like; ua lana ko lakou manao ma keia mau mea lapuwale, pau koke, a nolaila, aole hiki ia lakou ke noho me he poe malihini la ma keia ao, e hoopapau ana i ka waiwai pau ole o ka lani; aole hiki ia lakou ke malama i ke Akua a me Mamona. E na hoahanau ma Wailuku, aole anei ku pono keia olelo i kekahi poe iwaena o oukou? Ina i like me keia ko oukou ano, penei ko'u manao ia oukou, aole o oukou wahi kuleana iloko o ko ke Akua aupuni, aole loa no. Aia ke kau mai nei ka pouli, a me ka eha, a me ka hoomainoinoia imua o ko oukou alo. Auwe ka poe noho hewa iloko o ko ke Akua ekalesia! Oia ka poe make nui ma ka po.
Aole pau keia hoaoaka ana.
Aloha oukou. LIMAIKAIKA.

MAKAWAO.

            Ua palapala mai o Wilama M c Lane ia'u penei,
Makawao, Aug. 6, 1841.
E Limaikaika, aloha oe,
          Ua loaa mai ka Nonanona ia makou ma keia wahi, a ua makemake makou ia ia; i 16 no makou.
          Ke hana nei makou i ka makou hana. 65 eka ko i kanuia e maua me Mahina, a ua ulu maikai no. Ke hoomakaukau nei no hoi makou i ka lepo e kanu i 50 eka hou ae. 25 paha eka, 30 paha, i hoowaliia i ka oopalau. O kahi hemahema iki no ia o maua, hookahi wale no oopalau; kokoke nae paa ka lua. O ka oopalau pinepine a kope no hoi i ka lepo a wali loa, ka pono; alaila, ulu nui a maikai loa ke ko.
          Ua paa iho nei na hale lepokawili elua, o kekahi, he 36 kapuai ka loa, a o ka laula, he 25, he hale papa ia no ke ko; a o kekahi hale hoi, he hale kaulai ko, 102 kapuai ka loa, me 22 kapuai ka laula.
          Kanakolu eka ko o maua, ua oo, a ua makaukau e wiliia, a pau ia, 17 eka hou ua makaukau paha.. He nui na ipu hao ia maua, ina i piha, 720 galani iloko. O ka mea wili ka hemahema nui; kokoke nae loaa paha ka wili hao, alaila holo lea ka hana.
          Aole akaka ka nui o ke ko a me ka molakeke ma ka eka hookahi.
          O ka uku no na kanaka hoolimalima me maua, he hapawalu no ka la.
            Ehiku paa bipi kauo a maua, a ekolu paa hou ae, aole i hoolakaia. Elua kaa maopopo, a elua hou ae, aole paa loa. O ko maua hemahema nui hookahi no ia, o ka mea wili ko, o ka wili hao ka pono.
          Ke aloha aku nei makou a pau loa ia olua. W. MC LANE.

KE TI KAHIKI.

            No Kina wale no ke ti maikai; he mea inu wale no ke ti, he mea ia e hoihoi ai ka opu, a he mea hoi ia i makemake nui ia ma kekahi mau aina.
          Ke hoakaka aku nei keia pepa i ka nui o na pauna ti i kuaiia ma kekahi mau aina nui i ka makahiki hookahi; Ma Farani 230,000 pauna i ka makahiki hookahi; Ma Gerimania, 2,000,000 p. Ma Holani 2,800,000 p. Ma Rusia 6,500,000 p. Ma Amerikahuipuia 8,000,000 p. Ma Beritania 38,000,000.
          Ehia pauna ti keia ke huipuia? Ina hoi $1. ke kumu kuai no ka pauna hookahi ma Kina, ehia dala i loaa i ko