Ka Nonanona, Volume I, Number 7, 28 September 1841 — Page 27
1841.] KA NONANONA. 27
Kina poe? Ina hoi hookahi barela wai i pau i ka pauna ti hookahi, ehia galani wai i pau i ka inuia me keia ti? Ina no hoi i akoakoa keia wai a pau loa iloko o ka loko hookahi, pehea ka nui o ia loko? Pehea hoi ka nui o ka moku i lana maluna o keia wai?
KA NONANONA.
Honolulu, Sepatemaba, Tusede 28, 1841.
NA MEA PONO OLE.
Pono ole ke hele pu na keikikane a me na kaikamahine i ka auau.
Pono ole ke hiamoe iloko o ka hale pule.
Pono ole ke ku a haalele wale i ke anaina pule, i ka la Sabati. E noho no a pau ka pule, alaila hoi aku.
Pono ole hoi, ke haunaele ke anaina haipule i ka wa e hoomaikai ana ke kahuna i ke anaina ma kahi pule hope loa. E ku malie ka pono, a puka mai ka Amene hope loa, alaila hele.
Pono ole ke hakaka na kane me na wahine i mareia.
Pono ole ke hele nui na wahine i kauhale, e kamailio lapuwale, a e noho palaualelo.
Pono ole ka puhi baka a me ka ai baka.
Pono ole ke hele wale na keiki, me ka aahu ole.
Pono ole ke hooikaika ole na kane, i lako ko ka hale.
He nui na mea pono ole.
KO Ii MANAO.
Auhea oukou, e na makua mea keiki, a me na luna kula, a me na kumu kula o Oahu nei a puni;
Eia ko'u manao i a oukou a pau. E na makua; alia oukou e hoohewa koke i ke kumu kula, me ka hookolokolo ole, a me ke akaka ole o kona hewa. Alia hoi e huhu ia ia, ke hoopai oia i ka oukou mau keiki, a e haawi i wahi hana paha na lakou. Ia'u wale no, ke kahukula, ia mau hana, e hooponopono i na kumu ao.
E na kumu, eia ko'u manao ia oukou, i makaala oukou i ka oukou hana; e hooikaika mau; mai hakaka me na haumana a me na makua; mai hoopai i ka haumana me ka huhu. E kinai no nae i ka walaau a e hoomalu i na kula. Na'u J. Ii.
E ka Nonanona e. Aloha oe.
Ua ninau mai oe ia'u i na kapuai huinahalike, a me na kapuai paa, a me ka nui o na kanaka e piha ai ka Luakini o Kamika.
A pau kau mau ninau i ka nana ia e a'u. Alaila, hoala ae la au ia Manao, a me Noonoo i ko'u mau kokua, i ka mea nana e hai aku kau mau ninau; i ae la o Manao ia Noonoo, penei oe e imi aku ai i ka mea i oi aku ka ikaika mamua o'u, no ka mea, he Manao wale no wau, aohe kumu, a me ka welau, he kaulei wale no ko'u wahi i noho ai, a ia oe wale aku no ia wahi. Alaila, hapai ae la o Manao ia Noonoo. Penei ka laua i i ana; 125 kapuai ka loa, 60 ka laula, 12 ke kiekie, 36 no ka awai, 31 no ke kanaka hookahi.
Penei e imi ai, 125 x 60 = , 7,500 kapuai huinahalike, 7,500 x 12 = 90,000 kapuai paa; 7,500, - 36 = 7,464 x 8 = 59,712. 3 x 8 = 24 + 4 = 28 รท 59, -712 = 2,132 a me 16/28. Oia ka nui o na kanaka e piha ai ka luakini. Ua pau.
Aloha oe ka mea nana i hoala mai ia Manao a me Noonoo, e hele oe me ka pomaikai. Na KEPOOOKAMOKU.
OLELO HUNA.
Ku mai la kekahi moku kohola ma Honolulu, pae mai la iuka kekahi luina no Hawaii nei, a ike aku la kekahi kanaka ia ia, holo honua aku la i ona la, hopu aku la a honi iho la; uwe pu laua. Ninau mai la kekahi i ke kanaka no uka penei, "he hoahanau ou keia i pae mai nei?" I aku la kela "aole o'u kaikuaana, aole o'u kaikaina, aka, o ka makuakane o kela kanaka, he keiki ponoi no ia a kuu makuakane."
E hai mai oukou, heaha laua kekahi i kekahi?