Ka Nonanona, Volume I, Number 8, 12 October 1841 — Page 31

1841.] KA NONANONA. 31

ka puhi ana, he hana no. Ke olioli nei makou i ka mahuahua ana o ka hana pono ma Wailuku nei, no ka mea, o ka molowa a me ka palaka, he mau mea ia e poino nui ai ka aina, ke aupuni, a me kanaka.
                2. Eia paha kekahi hua maikai o ke kanu ko, o ka hoolakoia o kekahi poe, i na mea o ke kino.
                Aole ike nui ia keia hua, e like me ko makou makemake, a e like me ko makou manao mamua. Eia ka mea e ole ai keia hua, o ka molowa maoli, a me ka hoomaunauna i ka waiwai i loaa mai.
                Ke manao nei makou aole nele kekahi kanaka eka, i ka uku ole, ke hoomaunauna ole ia i kanawai. O ka nui o ka poe eka, aole hana lakou i ka hana e, a ua haawi aku lakou i ka waiwai i loaa mai, na ka poe lapuwale, a me ka palaualelo. Nolaila, ua ike ole lakou i ka lako i na mea o ke kino. Nowai ka hewa oia hana? O kekahi poe eka, o Lumilani, o Kawahinekuapu, o Kalaione, o Malaihi, o Apiki, a me Kama, o Pilipo hoi a me na mea like, ua hoolako ia lakou ma na mea o ke kino, no ka mea, he poe ikaika loa lakou i ka hana. Huli lakou i kela hana, keia hana, a loaa mai kekahi waiwai, aole hoomaunauna, aole paha haawi wale aku na ka poe hana ole. Nolaila, mahuahua paha ka hua maikai o ke kanu ko, aole nae akaka lea ia wahi.
                3. Eia paha kekahi hua maikai o keia hana. O ka hooemi ia mai o ka hooluhi kanaka ma keia pae aina.
                Mamua, aole ikeia ka hoolimalimaia o na'lii me kanaka. Ua oleloia, o ke kaili wale aku ka hana kahiko. Ina makemake na'lii i kekahi waiwai, kii aku lakou; ina makemake lakou i kekahi hana, kii aku lakou i kanaka e hana. Aole pela ka ke Alii hana ana ma ke kanu ko. Hoolimalima maoli kana. O ka poe eka, he poe hoolimalima lakou. Kamailio mai ke Alii, kamailio aku ua poe nei. He hana pololei keia. I ko makou manao, he mea paha ia e pau ai ka luhi a me ka hemahema o kanaka o Hawaii nei.
                Oia na hua maikai i ike ia ma keia hana. O ka hua ino i koe. Ma ka pepa e, e hoakaka paha au malaia. Nau na GELINA.

HE MEA PAAKIKI.

                He kahu lio o Kapaekukui, i noho ma Puna: a i ka wa i houluulu mai oia i kona mau lio iloko o ka pa, hele ae la o Kanekoa, i aku la oia penei, "Aloha oe, e Kapaekukui me kau mau lio hookahi haneri." Pane mai la Kapaekukui, "Aole he haneri na lio o'u; aka, ina i haawi hou mai oe i na lio i like ka nui me neia poe lio, a haawi hou mai no hoi alike alike me ia, a haawi hou mai no hoi i 7 1/2 lio, alaila ua loaa ia'u na lio hookahi haneri." E hai mai ka haumana akamai i ka helu, ehia mau lio ia Kapaekukui?

KA HAANUI.

                O ka haanui, oia ka ike aku ana i na kina o hai, me ka ike ole i ko kakou iho. O ka haahaa, oia ka ike ana, ka hoomaopopo ana i ka hewa o kakou iho me ka naau kaumaha no; aole i ka hewa o kela manawa wale no, o ka hewa e noho la no hoi kekahi.

HE NINAU.

                Owai na huahelu elua, ewalu ko laua like ole, a 240 ko laua huina hoonui? E hai mai kekahi kamalii ma Lahainaluna,

KA HOIKE.

                Ke hoike mai nei na kula o keia wahi, mai Maunalua a Moanalua. I ka po akahi (ka la 10) ka hoomaka ana, a i ka poalima hoopau, me ka ahaaina ma Pauoa.