Ka Nonanona, Volume I, Number 8, 12 October 1841 — Page 32

32 KA NONANONA. [OKATOBA,

PULE HOOMAU.

                He pule hoomau ma Kaneohe i keia mau la i hala ae nei. Ua piha ka hale pule, a ua makaala na kanaka i ka lohe. Ua hoi mai kekahi poe i auwana mamuli o na kumu pope.
                He nui ka poe i koho i ko ke Akua aoao.

FARANI.

                Ua kapaia na kanaka ma ko ka pope aoao ma Oahu nei, he poe Farani. Aole pono loa keia, no ka mea, aole pau loa na kanaka o Farani mamuli o ka pope, aole hoi o ko Farani poe wale no i hele ma ia aoao; o ko na aina e aku kekahi. Ma Farani, he nui iki i keia manawa, ka poe hoole i ka pope, a me kana mau oihana hewa a pau; a ua like ko lakou manao, a me ka lakou pule, a me ko lakou noho ana, me ka poe manaoio maanei. Nolaila, aole pono e kapa aku i ka poe pule me na kii, pule ia Maria, a hele i ka mesa, he pee Farani; Eia ka pololei, he poe pope, a i ole ia, he poe mamuli o ka pope. Pela e olelo ai, a e palapala ai hoi.

NO NA MOKU
KU MAI.

Ok. 9, Ka Ioka tauna, he moku manuwa no Amerikahuipuia, Kap. Aulika, ke alii.
" 9, Ka moku kalepa, Wilama Gray, Kap. Berua. Holo pu mai kana wahine, a me kekahi wahine e ae.
                Eia no ke ku mai nei ka moku manwa Berikania, o Kurekoa kona inoa, a o Kap. I. Jones ke alii. He moku nunui, iwakalua kapuai ke komo moloko o ke kai. He helehelena oluolu ko ka poe maluna iho.
                Mai Bolabola ka holo ana mai. He nui loa ka make ma Bolabola i keia wa i ka mai lele puupuu liilii. Na ka moku, o Kai ka inoa, i lawe aku ilaila mamua iho nei; a ua holo mai ua moku la maanei. Mai poino loa kakou i keia mai make. Ua like paha ia me ka okuu o Hawaii nei. No ka ooia ana mamua aku nei, pakele paha kekahi poe ke hiki mai keia mai maanei. Nani ka lokomaikai o ke Akua ia kakou. Kokoke pau auanei paha na kanaka Bolabola, no ka mea, aole o lakou i ooia mamua. Akahi wale no i ooia i keia wa ano iho nei. Aloha ino lakou.

                Olelo na kahuna lapaau o Hawaii nei, aole kokoke mai ka mai puupuu liilii, aole nae hewa ke pahui na kanaka a pau. Ina i loaa keia mai ino i kekahi kanaka, e noho kaawale ia ia.

                Kupanaha! Hookahi haneri a me kanalimakumamawalu kanaka malihini ma ka paahao o Honolulu nei i keia pule aku. No Maui mai ka nui, a ua hele mai e huli dala no ke kino.

O KA HIAMOE.

                Ma ka helu ana, ike pono kakou he iwakalua a me kumamaha ho ra i ka la hookahi. Mai ka puka ana mai o ka la i keia kakahiaka, a puka hou mai i ka la apopo, he iwakalua kumamaha hora. Ua kupaia ka manawa malamalama, he ao. A ua kapaia ka wa poeleele, he po.
                Ua pono i na kanaka apau ke hana.
                He mea ia e pono ai ke kino a me ka uhane. Aka, aole loa e hiki ke hana mau, me ka hoomaha ole. A o ke ao ka manawa pono e hana. No ka mea, ma ka malamalama o ka la, ike pono kakou i na mea a kakou e hana'i. A o kua po ka wa pono e hoomaha, a hiamoe hoi.
                E ninau mai paha kekahi, ehia hora pono e hiamoe ai i ka po hookahi? I ka manao o na kahuna lapaau, i eono hora, a i ole ia, ewalu paha, no na kanaka, a me na wahine makua. Ina hiamoe kekahi poe eono hora, alaila ala, aole loaa mai ka nalulu, a o kekahi mai e ae paha, ina ua hiki no eono hora no ia poe, e hiamoe ai. Aka, pono e oi iki aku ka manawa hiamoe, no ka nui o kanaka ma na aina wela, e like me Hawaii nei. E hiku paha hora ka pono maanei, a ina ewalu, aole hewa ka loihi.

Aole pau.