Ka Nonanona, Volume I, Number 9, 26 October 1841 — Page 36
36 KA NONANONA. [OKATOBA,
mau la. Hele no laua ma ke alanui, a hina koke ilalo, a kaili aku ka hanu.
Aia ma Waimea kekahi i hoakakaia ma ka palapala a Keliumiumi, malalo iho.
Koloa, Sepatemaba, 23. 1841.
Ua make ma Waimea i Kauai o Kaihuhanuna, i ka la eiwa o Sepa temaba nei kona make ana, he make hiki wawe no; no ka mea, aohe ona mai mamua aku, e noho ana no oia me kona kino ikaika, puipui, pauhakaki no hoi, hoomaka kona mai i ka la ehiku, a i ka la eiwa make no.
O ka pau koke ae la no ka ia o kona noho pu ana me kona poe makamaka. Aloha ino, wahi a kona pokii. KELIUMIUMI
Auhea oe, e ka mea heluhelu; ke ninau aku nei au ia oe, heaha ke ano o keia hana ana a ke Akua? Aole anei keia he kumu e paipai ia oe e noho makaukau? E koli i kou ipu kukui, e ukuhi i ka aila, a e noho makaala me ka malamalama? Penei kekahi olelo, Mataio 24:44. 'Pela hoi oukou e noho ai me ka makaukau; no ka mea, i ka hora e manao ole ia'i e oukou e hiki mai no ke keiki a ke kanaka.'
KE KANAKA MAKE IA IA IHO.
Ua make ma Waikapu Okatoba 9, po iho, e kona lima iho, o Aipuhi ke kanaka o Anetone ka haole. Aole ikeia mamua kona pilikia. Ua olelo ia, aole ona hihia, aole hakaka ia me kana wahine, noho oluolu no laua. Ia po, i ka wa hiamoe ka wahine, haalele ia ia ia, a puka iwaho. A mahope iho, ala ka wahine, aole loaa ia ia kana kane, kii aku ia ia. Hele mua ia i na hale o kona poe hoalauna e kokoke ana, aole ike aku ia ia malaila. Alaila, komo ia iloko o ka hale kuke o Anetone, kuni i ke ahi, aia hoi, kana kane, e kau ana maluna. Holo kiki ua wahine nei, hea aku me ka leo uwe nui, holo mai o Anetone me kanaka, paa koke ia ia ke kino i oluolu ke kaula ma kona ai, alaila oki aku ke kaula me ka pahi, a haule ilalo. Hana lakou i na mea e ola'i ke kino, aole ola, o kona make no ia. E noonoo oukou e ka poe heluhelu i keia olelo. A "e hoomakaukau e halawai pu me ke Akua," e haawi koke i ka naau i hoopakeleia mai oukou i ka hoowalewale ia mai.
KAILUA.
Ua lohe makou, aia no ka Uhane o ke Akua ma Kailua. He nui wale ka poe noonoo ia lakou iho, noho mihi, a me ka hele ia Kristo. E ke Akua e, e hana mai oe pela ma na wahi a pau loa o Hawaii nei. E like me ka ua maluna o ka honua, oia ka mea e ulu ai na mea uliuli a pau, e olioli ai ka manao; pela na anaina kanaka ke hiki mai kou Uhane Hemolele.
HANA NAAUPO.
Ua lohe iho nei ia no K-, he haumana ia mamua o ke Kulanui: peneia, "I ke kakahiaka nei, ua lawe o K- i kekahi kaikamahine opiopio maka maikai, i wahine nana. O ke kaikamahine opiopio maka maikai, wahi anei au? Aole loa. He wahine hemahema, naaupo, momona, puipui ke kino, pelapela no hoi! He nui ke kino ona, he hapalua ko ke kane o K-! Aole hiki ia ia ke heluhelu palapala, aole hoi i ike i ka hana; o ka noho wale, hoomolowa, palaualelo kana mea i ike ai. Aole ona manao e ae, o ka noho i mea na K-! Aloha ino!" Pela mai ka palapala.
Oia anei ke ano o ka wahine a kekahi haumana o ke Kulanui nei i koho ai i wahine nana? Owai ka mea lapuwale loa o laua, o ka wahine anei o ke kane paha? Hana ka wahine mamuli o kona naaupo iho. He naauao ka ke kane, a ua hoopili aka ia ia iho i ka mea naaupo; oia ka hoi hou ma ka naaupo. E holoi i ka puaa, e hookeokeo ia ia i ka puna, e mau anei kona keokeo ana? Pela ka naauao o kekahi poe. Lama Hawaii.