Ka Nonanona, Volume I, Number 10, 9 November 1841 — Page 38

38 KA NONANONA . [NOVEMABA,

            Eia ko laua inoa. O ke Kamaaina a me ka Malihini.
            Elua kumu ao no hoi i hoike mai i ko laua manao. Ua mahalo nui ia keia hana e na kamaaina.
          Kekahi mau kanaka makua no hoi e kula ana i keia mau mahina i hala iho nei. O ke Kauoha Hou ka palapala a lakou i heluhelu nui ai; a o ka Mane Lani hoi kekahi.
            Eia ka nui o na kanaka makua i hele mai i ka hoike, 409.
          Eia ko'u wahi manao no na kula ma ko'u wahi kihapai i keia makahiki. Ua oi nui aku ka maikai o na kula i keia manawa. Akahi wale no ka hana pono o na kumu a me na haumana ma na kula.
          Aole nae pono loa keia hana ana.
          Eia no kekahi mea pono ole iloko o na kula i keia wa e noho nei; o ka walaau a me ka hoolohe ole o ha haumana i na kumu. Nolaila, ua pono i na kumu ke imi ikaika i na mea e maluhia ai na kula.
Na KAMIKA.

KEKAULUOHI.

            Ua ili ka moku Kekauluohi ma Hauula, i ke kakahiaka o ka Sabati i hala iho nei, a ua naha. Ua puka, a piha i ke kai. Hooikaika makou i ka la Sabati e hoopakele ia ia; aka, ua mokumoku wale na kaula, aole nae i hemo iki. Hooikaika Kekuanaoa ma i keia mau la e hoopakele ia ia, aka ua paa ma na pohaku. I keia manawa ua aneane pau ka iwi keele, ua hemo ka hoe uli, ua hai kekahi kia, a ua hemo kekahi. Nui ka waiwai poho malaila. Aloha ino na'lii, nona ka waiwai lilo wale. Aloha ino ke kahu moku no kona kaumaha; aloha ino na kanaka ma Koolau, no ka mea, ua lilo ko lakou Sabati no ka moku.
          Eia ke kumu o ka ili ana o ia moku. Ua manao ke kahu e holo malu i ka la Sabati, a nolaila, aole ia i noi i na kanaka e kokua ia ia me na waa. Ina he la e ae, aole i lilo ua moku la. Ua like ke kumu o ka ili ana o keia moku me ko ka Wailele ma Mokuleia. Ua naha kela no ka holo ana ma ka la Sabati. Ahea e naauao na kanaka; ahea e ike lakou i ka pono o ka malama ana i ka la Sabati? EMEKONA.
Waialua Oct. 27. 1841.

O KA HIAMOE.

            No na keiki umikumamalua paha hora, a umikumamaono no kekahi e hiamoe ai. Aia i ko lakou uuku. Ina uuku loa, hiamoe no lakou ka nui o ka manawa i ke ao a i ka po.
          Eia hoi keia. O ka wahi pono no na kanaka e hiamoe ai. He mea nui keia, no ka mea, ina moe malalo kekahi, ma kahi ino, pulu paha i ka wai, ina e loohia auanei paha i ua mea la ka hui ma na lala, ka lolo paha, ka nainai, a me na mai e ae i kekahi manawa. Pela ka hiamoe ana o kekahi poe ma keia pae aina. Kulu paha ka hale, a pulu ka lepo iloko, a moe iho la ke kanaka, a hiamoe malaila. Aole ona manao ma kahi ino kona moe ana, no ka mea, he moena paha malalo iho ona, a maloo ia, a maikai ke nana'ku, aka, ina pulu iki ka lepo malalo, ua nui ko ke kakaka pumahana i lilo malaila, me kona ike ole hoi, no ka mea, ua hiamoe oia. O keia kekahi kumu nui o na mai i kakauia iluna, ma Hawaii nei. A eia kekahi mea e akaka'i ia kakou ka mauu o ka lepo iloko o na hale o kanaka, o ka popo wave o na moena i kau ia malalo. Pehea na moena i kauia ma ka hikiee? Aole popo wave ma ia wahi, no ka mea, ua maloo loa malaila. Ma ka hikiee ka pono, kahi maloo, e hiamoe ai.
          Eia no hoi keia. I ka manawa nui ka wela, hana kekahi poe i puka ma kahi o kona poo, i loaa mai ka makani i mea e hooluolu ia ia. He mea pono ole keia. He kumu no ia o ka mai ma ke poo, ma ka pepeiao, ma ka ihu, a ma ka puu. Ua ike au i kekahi poe hana i ka puka makani no ka poe mai, nawaliwali loa. Ina he kuni ka mai a