Ka Nonanona, Volume I, Number 10, 9 November 1841 — Page 40

40 KA NONANONA. [NOVEMABA,

NA MANUWA.

            Ua pau i ka holo na manuwa elua. Olelo mai na kapena, aole pilikia e noho loihi ai maanei. He nui no nae na mea pilikia a Kanekele Beritania i hoopii aku imua o Kap. Jone, ka mea ia ia ka moku manuwa Beritania, aole nae maopopo ka hewa. Ua hoohihiaia na'lii, me ko lakou hewa ole.

KA RAMA A ME NA MEA ONA.

            Ua mahuahua ka inu ana i na mea ona i keia manawa ma Honolulu nei. He umikumamahiku na hale kuai rama, a he nui na hula haole, uhauha, hakaka. Eia no nae ka mea kaumaha loa, o ka inu ana o kekahi mau alii i na mea ona. He hewa loa keia. Me he mea la ua kau ka mai ma ke poo o ke aupuni, no ka mea, o na'lii ke poo o ke aupuni; a ina i mai ke poo, a holo ka mai iloko o ka lolo, pehea ke kino? Pupule, hehena, a pono ole hoi ke kino. Auhea oukou e ke alii nui a me na'lii inu i na mea ona, e nana mai oukou i keia olelo a Solomona ke alii akamai, "He mea henehene ka waina, he walaau nui hoi ka mea e ona'i, o na mea a pau i puni malaila, aole ia i naauao." Eia kekahi, ma Solomona 31:4. "Aole na na'lii, e Lemuela e, aole na na'lii e inu i ka waina, aole hoi na ka poe aialo e inu i na mea ikaika."
          E na'lii, ina i hoomau oukou i ka inu i na mea ona, e ike koke auanei oukou i ka hewa: emo ole ko oukou pilikia. Kulanalana ke aupuni, a hele haukae, e like me ke kanaka ona, a hina wale ilalo. O ko oukou kino kekahi, e hina ilalo; no ka mea, o ka ona kekahi mea e make ai ke kino. O ka hakaka kekahi mea e pilikia ai oukou; Ua ike oukou i keia, i keia mau la i hala ae nei; mai poino oukou malaila. Nolaila ke paipai nei au ia oukou me ke aloha, e haalele i na mea ona a pau loa. Mai pepehi i ko oukou aupuni; mai pepehi ia oukou iho.

MOKU PILIKIA.

            Oka. 4. I keia la ua pilikia loa kekahi moku kalepa ma Honolulu nei, o Glouseta kona inoa; ua aa ke ahi iloko ona, a ua pau kekahi waiwai a me kekahi mau laau; Ua kinaiia no nae ke ahi, a ua pakele ka moku, no ka pono o ka hana ana. Ua oleloia he ahi baka ka ke ahi i wela ai keia moku haule iloko o kekahi pulupulu. Ina pau ua moku la i ke ahi, $60,000 ka poho. Ua piha i ka waiwai a ua makaukau e hoi ma Amerika.

HALE PULE.

            Ke hapai nei makou i ke oa o ka hale pule pohaku ma Honolulu nei. Kokoke paa ka pohaku o ka hale pule pope. He hale nui ia e like me ka luakini ma Lahaina.

MOKU NAHAHA.

            Ua pau i ka nahaha ka moku o Kekauluohi, a ua mokumoku liilii. Hooikaika loa o Kekuanaoa a me na kanaka ona, e hoopakele ia ia, aole hiki, no ka piha loa i ke kai, a me ke kai koo kekahi. Minamina ino keia moku maikai. No ka hawawa o ke kapena a me ka hoolohe ole o na kanaka malalo ona keia poho: no ka holo i ka la Sabati kekahi i ka wa kanaka ole e kokua. Olelo mai kekahi kanaka noonoo, no ka uku ole ia o na kanaka maluna o na moku o na'lii, kekahi hewa. No ka uku ole ia, aole ikaika i ka malama i ka moku.
          Ua hoi aku o Kauikeaouli ma i Maui i ka la 1, o keia malama.