Ka Nonanona, Volume I, Number 11, 23 November 1841 — Page 42
42 KA NONANONA. [NOVEMABA,
manao he mea hoino i ke Akua ka hewa; a nolaila holo kona manao e hooki ia mea. Noho no oia me ka makau i ka hewa, a me ka haalele maoli. Aole oia i launa iki me ia. Mai kona wa i haawi mua i ia ia iho i ke Akua, aole oia i noho a hana hewa iki. Ekolu a kokoke eha mau makahiki o kona noho ana me makou ma Molokai nei, aole loa makou, aole oia i loaa ia makou e hana ana i kekahi mea ku e i ke Akua. Me he mea la ia e noho ana i ke alo maoli o Kristo, aole e hiki ia ia ke hana i kekahi mea pono ole. Aole oia e makau i ka hewa, no ka make e ili mai ana, no kona ike ana ia mea he ino maoli no, nolaila kona makau i ka hewa.
Eia no hoi kekahi ano maikai o Manawahine. Ua haahaa kona naau, a ua akahai, a ua oluolu. O ka naau haahaa ke kilohana no ia o na mea maikai a pau o ka pono o Iesu. Ke i mai nei ka Haku, "Pomaikai ka poe i haahaa ka naau, no ka mea,no lakou ke aupuni o ka lani." Ua maopopo loa i na mea a pau i ike ia Manawahine, o kona ano mau ia o ka hoohaahaa o ka, naau. Ua ike lea oia ia ia iho he mea hewa a he mea liilii loa imua o ke Akua, a nolaila, aole oia i noho a kaena i kona maikai. O ka hoahewa ia ia iho, imua ona o kana ia. O ka hookiekie i kona akamai, o ka hookano no kona noho kumu ana, a o ka haaheo no ka maikai o kona aahu he mau hawa ia ana i nele loa ai. Aole oia i noho a hoahewa ia hai me ka hoomaikai ia ia iho, aole loa, aka, ua ku pono oia i kela olelo maikai o Paulo, "Me ka naau haahaa, e manao kela mea keia mea ua maikai aku o hai ia ia iho." Oia ko ia nei ano; manao noia ua oi aku ka pono o ke kanaka e ae i kona.
O kona akahai, oia kekahi ano maikai ona. Aole oia i hoino i ka mea nana ia i hana mai. I ka wa i olelo ino ia oia, aole oia i olelo ino hou mai. Aole loa i holo ino kana olelo i mea e hoopai ai i ka mea ku e mai ia ia. He wahine oluolu ia, aole huhu, aole nuku aole wahapaa, aole pakike, aole maka ino. He helehelena oluolu no kona, he launa maikai, a he hookipa. O na mea a pau i komo loko o kona hale, aole lakou i ike i kekahi ano e ae iloko ona, o ka oluolu wale no. Nui no kona oluolu a me kona hoomaikai ana i kana kane. Aole ona ike i ka hakaka me ia aole hoi i ke pakike. Ua ko ia ia ke kauoha a Petero i na wahine haipule, "E na wahine e noho oukou malalo iho o ka oukou mau kane iho." Ua oluolu no ia i na kanaka maoli a me na ohua e noho pu ai me ia. Aole oia i hoowahawaha i ka poe ilihune a me ka poe naaupo. Aole oia i olelo hooweliweli mai, aole oia i hookuke ia lakou e hele pela.
O ke aloha i na uhane o kanaka, kekahi mea nui ia nona. Mai kona wa i huli mai oia ma ka pono a hiki mai kona make ana ua hu ae la kona aloha i na uhane o ka poe pio. I kona wa i hoopau ai i kona ku e ana ia Iesu, e ake koke kona naau e hoopau na kanaka a pau i ko lakou ku e ana ia ia. I kona wa i ike ai i ka maikai, a me ka mana o Iehova a me kona nani, ikaika loa kona makemake e hoike i ka poe ike ole, a ike no hoi lakou ia mau mea ua ike oia i kona hoopakeleia mai, mai ka luaahi mai, a makemake ae la oia e pakele na kanuka hewa a pau.