Ka Nonanona, Volume I, Number 11, 23 November 1841 — Page 43

1841      KA NONANONA.      43

Nolaila ea, I kona wa i noho ai ma kona aina aloha, aole oluolu kona naau i kona ike ana, he nui na kanaka naaupo ma na aina e, e noho ana me ka ike ole i ka mea e ola'i: I kona lohe ana i ko oukou noho ana ma Hawaii nei i ka naaupo, holo koke kona manao e holo mai ia nei e kokua mamua o ko oukou ola.
            A mai kona wa i pae mai ai maanei, ikaika loa kona imi ana i ka pono o na uhane o kanaka. Wikiwiki ae la oia i ke ao i ke oukou olelo, aole emo kona hoomaka ana i kekahi kula no na kaikamahine. Aole loa i hele mai oia i keia pae aina e imi ana i kana iho. Aole no ka waiwai maoli kona hele ana mai, aka, i hele mai oia i pomaikai na wahine a me na kamalii o Hawaii nei ia ia. I kona aina aloha ia lako no oia ma na mea a pau o keia noho ana. Aole oia i nele i na mea e oluolu ai kekino malaila. Aka, aole oia i minamina i kona makuakane, a me kona makuwahine, aole i kona mau kaikuaana a me na kaikaina, aole oia i minamina i kona one hanau a me kona lehulehu. Haalele no oia ia mau mea a pau no kona aloha na uhane e make ana. Me he mea la ia e haawi ana i kona ola iho i mea e hoopakele i ka poe hewa i ka make.
            O na wahine a me na kamalii o Molokai, ka poe i ike nui i kana hana mau ana i ka hana a ke Akua iwaena o lakou. O lakou ka poe i ike i kona helehelena oluolu, akahai maloko o kona hale; o lakou ka poe ike i ke kaumaha o kona naau no ko lakou naaupo ana. O lakou ka poe i lohe i kona pule ana i ke Akua no lakou, a me kona hooikaika pinepine ana ia lakou e haalele i ka hewa a e huli ma ka pono. O lakou ka poe i ike i kona paupauaho ole i ke ao ana i na luwahine i ka heluhelu i ka ke Akua olelo. O makou no ka poe i noho pu me ia i keia mau makahiki ekolu, ua ike makou i kona lilo loa ana ma ka hana e pono ai na kanaka o keia wahi. Aole i makau oia i ka luhi, no ka nui o kona aloha i na kanaka.
            Pela ka noho ana o keia kauwa akahai a ke Akua a hiki mai ka makalii hope iho nei. Hele na hoala wehana ona i Honolulu i ka ahaolelo Misionari. Noho mai kela me kana kane me ka manao e malama laua i na kula, a me na halawai o na hoahanau. Aka, aole pela ko ke Akua manao. No ka mea, aole i liuliu a ua loohia oia e ka mai. Aole nae i manaoia kona mai he nui ia wa. Hele laua i Lahaina me ka manao e pau koke paha ka mai a e hoi koke mai no. Aole. Mahuahua no ka mai kuni a me ke kunu, aole pono iki ke lapaau. Holo laua i Honolulu me ka lana o ka manao e pau koke paha ka mai. Hiki aku ilaila, mai no. Aole i emi iki, makau na makamaka ona o ola ole paha ia. Ua ikeia he mai ino. Aka, e lana ana kona manao e ola, a e hoi mai no i Molokai. Oia mai no a hiki i ka la iwakaluakumamalima o Sepatemaba a o kona hele ana aku i ka lani no ia.
            Eia kona mea kupanaha i kona moe ana i ka mai, o kona hoomanawanui i ka eha me ka ue ole. Me he mea e moe oluolu ana la no ia. I ka wa i ninauia'i kona pilikia hoole mai kela, aole eha nui. Aole ia i ohumu iki i ke Akua no kona hooeha ana mai ia ia. Mahalo oia i ka lokomaikai ona, mai ka mua a i ka