Ka Nonanona, Volume I, Number 12, 7 December 1841 — Page 46
46 KA NONANONA. [DEKEMABA,
nei poe moe kolohe, i ke kanawai kahiko i pili i keia hewa? He kanawai oolea anei i ko oukou manao? He ino anei? Kahaha! Nawai i kau mai ia kanawai paa, a me ka uku? Aole ike anei o Iehova i na kanawai e pono io ai ke kanaka, a e maluhia ai ka aina? Ua hewa anei ke Akua i kona hooweliweli ana i na kanaka ma ke kauoha e hoopai koke ia ka poe kolohe, hihia i ke kanawai ehiku? Aole loa ke Akua i hewa ma keia kanawai, a me kona hoopai ana i ka poe malama ole. Ua hemolele, ua maemae, ua maikai wale no oia ma keia kanawai paa, e make koke ai ka poe moe kolohe.
Aole akaka anei ko ke Akua manao i ka poe moe kolohe kahiko? He Akua luli ole ka manao. Mau loa kona huhu i ka poe hihia i keia kanawai.
Na'u na ke KAHU EKALE SIA.
Lahainalalo, Maui, Sep. 29 1841.
Aloha oe e ka Nonanona.
Eia keia manao hoike aku ia oe, i kekahi mea pono ole; e hoopaa ia ma ka eleele o ka inika maluna o kou wahi kino uuku, ma Lahainalalo nei; i ike kela mea keia mea a pau. He nui ka haunaele ma keia kulanakauhale o L. lalo nei, a me ka uhauha, a me na mea e poino ai ke kino a me ka uhane. Eia ke kumu o keia haunaele, a me ka uhauha; a me na mea e hoino ai ke kino a me ka uhane. O ka nui loa o ka ona, ua paa loa o L. lalo nei i na mea paa o ka ona.
Eia na mea paa maloko o ka ona, o ka hakaka, o ke kue i kekahi i kekahi; o ka mokuahana, o ka hoino; o ka palaualelo, o ka lealea i kela la i keia la. O ka mokuahana i ke aupuni o ke Akua, o ka uhauha i ka la kapu o Iehova me ka makau ole; oia ka hana a ko L. lalo nei i keia manawa. Eia keia, aole o na kanaka makua wale no ka i lilo aku. O na keiki kekahi, a o na malihini kekahi. Nolaila, ua nui loa ka poe i haule iloko o keia luapau; o ka make e kai a huakai ana lakou iloko o ka ona; a me ka ilihune a me ka popopo o na iwi. E iho ana lakou a pau iloko o ka hale halawai o Satana, a me na daimonio.
Eia keia manao hoakaka. Auhea oukou e na kanaka ona, a me ka poe ike i ka heluhelu. O ka lilo loa ana o na kanaka, a me na keiki i ka inu rama, he mea ino loa ia, he mea e hoino ai i ke kino a me ka uhane, he hana ilikole ia. He hana puakaka ia. Eia kekahi mea poino loa, o ka ae ana o na makua i ka lakou poe keiki, e inu i ka rama; kupanaha loa ka hana a na makua i ka lakou mau keiki. No ka mea, o ka inu rama, he kumu ia no ka naaupo, a me ka poeleele o ka naau; a me ka hiki mai o na ino a pau maluna o ke kino. Eia hou keia, mai alakai hou e na makua i ka oukou mau keiki ma ka inu rama, o lilo oukou i poe hoahewa ia e ka makua nui ma ka lani, e ka makua nana na keiki a pau loa. No ka mea, aia ka makemake o ka Makua nui ma ka lani, o ka lilo o na keiki i poe pono; a loaa ia lakou ke ola o ka uhane, a me ka noho pu ana ma ka lani. No KAUMAEA.
Eia keia manao hoakaka, no kela manao maluna. O ke kumu i loaa ai kela haunaele, a me na mea ino a pau i hoike ia anei maluna, ma L. lalo nei; O ka ae ana o kekahi kanawai, a na 'lii i imi ai i ke kuai rama; penei, ka ae ana. Ina e kuai kekahi ma ka omole liilii, e uku ia oia i $50. Ina e kuai kekahi i pahu olokaa aole ia e hewa," no ka mea, he kuai olokaa. Nolaila, ma keia ae ana, e kuai olokaa; nui loa ka poe i kuai iho nei i ka rama ma L. lalo nei, i keia manawa. O na haole kekahi, a me na kanaka maoli kekahi. Nolaila mai ke kumu o keia ino o L. lalo nei. Na KAUMAEA.
Ua loaa like na dala ia Wana laua o Kauakahi, kuai iho la o Wana i kaulua bipi a lilo aku la na dala 25, a kuai aku no hoi o Kanakalu i lio nona, a lilo aku la na dala 60, alaila ua ikeia ua palua ke koena o na dala ia Wana i ko Kauakahi koena. Ehia na dala i loaa mua ia laua?