Ka Nonanona, Volume I, Number 12, 7 December 1841 — Page 48

48 KA NONANONA. [ DEKEMABA,

me ka maluhia! O hele i ka ahaolelo o ka la nui mahope me ka maluhia! O hele i kela ao pau ole me ka maluhia!"
          Elua poe kanaka naauao, a elua wale no: - o ka poe e malama ana i ke Akua, no ka mea, ua loaa oia ia lakou: a o ka poe e imi ana ia ia, no ka mea, aole i loaa oia ia lakou. Hiki no na mea e ae a pau ke olelo iho, Aole anei he wahahee ma kou lima akau?
          O ke komo ana mai o ka hewa, ua like ia me ka Iaela hana ana.
          Nana no i lawe mai ai ka waiu paa ma ka ipu nani. Aia i hooluoluia a hoohiamoeia ke kanaka, ua kokoke mai ke kui a me ka hamare.

NO NA MOKU.

            Dek. 2. Holo mai a ku, ka moku kalepa, o Kaliponia ka inoa, no Bosetona mai. I kakahiaka ae, i kona komo ana iloko o ke awa o Honolulu nei, ili ua moku la, a mai nahaha loa; ua hoopakeleia nae. O ka lauwili ikaika ana o ka makani kona mea e ili ai.
            Dek. 2. Holo aku la ka moku kalepa, o Wilama Kalei, i Bosetona. Ua ee aku la maluna ona, o Mi Katela me kana kaikamahine, o Mi. Mana, me kana mau keiki elua, o Mi. Belika me kana wahine a me ka laua kaikamahine. O na misionari ia. He mau kane a me na wahine haole e ae kekahi, i holo pu.

KA HAWAII.

            Ua lohe makou, ua pilikia ka holo ana o ke kialua, o Hawaii, i Hilo i keia mau la iho nei. Aia no Mi. Wilikoke me kana wahine me na keiki maluna iho. Ma ke kowa iwaena o Hawaii a me Maui, kahi i pilikia ai, no ka ikaika loa o ka makani, a me ka ino o ke kai. Pau e ka ai, a holo iuka o Wilikoke ma; Holo wale no ka Hawaii io ia nei, aole nae akaka ka pae ana ma Hilo.

          Ke hoomakaukau nei ke Kanikele Amerika, (P. A. Brinsmade, Esq) e hoi iki aku i Amerika, a hoi koke mai no. He 10 malama, wahi ana, a hiki hou mai maanei. Aia no nae i ke Akua ia wahi. Ma Mesiko kona hoi ana aku.

HE ALOHA KUPAIANAHA.

            Eia no ilalo keia palapala a kekahi keiki ma Lahainaluna. E nana mai oukou i ka nui loa o kona aloha ia Koa a me Kaiaikawaha. Ano e kona aloha! Kupaianaha! akahi no ke aloha nui! He aloha dala, ka! a me ka lole. Aole anei keia he aloha hoopilimea ai?
            I ko'u manao ea, aole pono loa keia noi ana a ua keiki nei, i waiwai nana, ia Koa ma. Ua lako na keiki o Lahainaluna, aole pilikia, a he mau kuaaina ilihune keia, aole hoi he mau hoahanau laua no ua keiki nei.

LAHAINALUNA Au. 11, 1 841.
          Aloha oe e Kaiaikawaha a me Koa; aloha oukou a pau loa. Eia no au ke aloha aku nei ia oukou maloko o neia wahi pepa; he nui kuu uwe ana ia Kanealii kuu aikane aloha o Lahaina nei. I kona manawa i make ai, kauoha oia ia'u e aloha aku ia oukou a pau loa; nolaila keia wahi palapala ia oukou, e o'u poe makua ma ke kino; Mai hoohewahewa mai oukou ia'u, ua ike no o Koa ia'u, o Kanakaole ko'u inoa. Aloha oukou a pau loa.
          Eia kekahi manao o'u ia olua, ina ua loaa ka'u wahi manao ia olua, i wahi dala na'u, i wahi lole no hoi kekahi i wahi kamaa no'u, oia kau wahi nonoi ia olua. KANAKAOLE.

          E kuu keiki, ina e hoowalewale mai ka poe hewa ia oe, Mai ae aku.
          Ina lakou e olelo mai, E, hele pu kakou, E hoohalua no ke koko, E hoohalua wale i ka mea halaole;
          E moni ola ia lakou me he lua la, E moni okoa hoi e like me ka poe e haule ana i ka lua; E loaa ia kakou ka waiwai maikai he nui, E hoopiha i ko lakou mau hale me ka waiwai pio;
          E hailona pu oe me makou i kou kuleana, i hookahi puolo na kakou a pau.

Na LIMAIKAIKA, e hoopuka'ku.