Ka Nonanona, Volume I, Number 14, 4 January 1842 — Page 54

54 KA NONANONA. [DEKEMA BA,

a pau loa; eia ka hoailona e mau loa'i ua kuikahi nei.
          PAUKU II. Eia hou neia, a o ko Amerika poe moku mai a me ko laila Kanikele, a me ko laila kanaka ma keia pae aina a me ko lakou waiwai, a hiki i ka wa kaua, e pau ia mau mea i ka malama pono ia e ko Hawaii nei i ko Amerika enemi a pau loa.
          PAUKU III. Eia hou neia, e makemake ana keia mau poe e loaa mai ia lakou ka waiwai a ke Akua i haawi mai ai, i ka hookuai pu ana a me ke aloha pu ana o na aina o ka poe nana keia olelo, nolaila hoi no ka paa pono ana o keia mau mea mahalo, e ae mai ua mau alii o Hawaii nei, e pono ia laua e komo no iloko o ko laua awa a me ko laua mau wahi e ku ai ka moku, o na moku Amerika a pau, a e malama nui aku i ua mau moku la a me na ukana maluna a me na alii a me na kanaka o ua mau moku la oi hana pono mai lakou a i haki ole ia lakou na kanawai a keia aina i kau ai, e kuai no hoi ko Amerika, me ko Hawaii neia poe kanaka.
          PAUKU IV. Eia hou neia; ke olelo io nei ua mau alii nei, e malama nui laua i ko Amerika poe moku ke ili mai ma ko laua pae aina, e hooikaika pono aku laua i pakele ai ka moku ili a me kana mau mea a pau a me kona ukana. He pono no e loaa mai i ko Hawaii nei poe ka uku no ko lakou hooikaika ana i pakele ai ua moku ili la a i malama pono ia ka mau mea ana. - Eia ka uku, he mau dala paha, a i ole ia, o kekahi puu o ka waiwai i hoopakeleia ai, ka uku. Ina ekolu puu waiwai ua like, hookahi puu paha ka uku, aka, aole loa e nui aku ko lakou uku i kekahi o ua puu waiwai ekolu la.
            A o ka mea nana ka moku a o ka poe i hoopakeleia ai ka waiwai, e kuhikuhi pu lakou i kekahi mau kanaka e aole no lakou ka waiwai na lakou hoi e hoike mai i ka nui o ka waiwai i malamaia ai.
          PAUKU V. A o ko Amerika poe kanaka e kuai ana ma ko Hawaii nei pae aina, ka poe e noho ana a me ka poe e holoholo ana, e pau lakou i ka malama ponoia i ka lakou hana ana i ka mea i ku i ke kanawai.
          A he pono no lakou e hoopaa i ka poe lawehala ma ke kanawai, a ma ka ahaolelo e loaa mai ai ia lakou ka uku e pau ai ka aie pono a pau a na kanaka o ko Hawaii nei alii e like ai me ke kanawai pololei a me ka oihana o ka aina naauao i ikea ai.
          PAUKU VI. Eia hou neia, ke olelo io nei ke alii nui laua o kona kahu ka olelo i paa ai laua i ka hooikaika aku laua e pau ai ka mahuka ana mai o na kanaka o ko Amerika mau moku e hiki mai ana i ko Hawaii nei pae aina, e alai aku no i ka mahuka ana mai.
          No ia mea, he pono no na'lii malama aina, a me na kilo, a me na kiaaina, a me na kaualii a pau e hopu aku a paa ka poe mahuka a pau, a e hoihoi aku i ka mea nona ka moku i haalele ia aku ai.
          A e ukuia mai ko onei poe i hopu aku, e ka mea nona ka moku. Ina ma ka aoao o ka aina e ku ai ka moku e paa ai ka mea i mahuka, e ono dala ka uku. A ina ma kela aoao o ka aina e paa ai umi a me kumamalua dala ka uku, a ina ma ka aina e i moku i ke kai e paa ai a i hoihoi i kona moku, iwakalua dala a me kumamaha ka uku noloko pono keia uku o ka waiwai a ka mea mahuka i hoolimalimaia'i, malaila e kau ponoia'i.
          PAUKU VII. Eia hou neia; aole