Ka Nonanona, Volume I, Number 16, 1 February 1842 — Page 75

1842. KA NONANONNA. 75

                Eia kekahi; he maunu moe kolohe ka baka no ka poe puhi baka.
                Eia kekahi; he maunu puhi hale ka baka no ka puhi baka.
                Eia kekahi; he maunu puhi wahi kapa ka baka no ka poe puhi baka. Ua hewa loa ka baka. Na BAKAMIA.

PUHI BAKA.

                I ka wa o Iakobo I. ke alii o Beritania, ua lilo loa na'lii a me na kanaka i ke puhi baka.
                Ua makau ka poe kahuna pule ke hoike aku i ka hewa o keia hana ana o hoinoia mai lakou. Alaila kakau ke alii nui o Iakobo i palapala hoohewa i ke puhi baka.
                Eia ka pau ana o ka palapala a ke Alii. "O ka puhi baka, he mea hoopailua ke nana'ku; he mea pilau ke honi aku; he mea ia e eha ai ka lolo; he mea hoi ia e pono ole ai ke akemama. O ka uwahi eleele o ka baka, ua like loa ia me ka uwahi o ka luaahi."
KE K. HAWAII.

NO KA MOE KOLOHE. HELU 3.

                O ka mea moe kolohe, ua hana hewa ia i kona uhane iho. E huli kakou i ka ke Akua olelo i akaka lea ia mea. Solomona 6: 32. "O ka mea moe kolohe me ka wahine, aole ona naauao, o ka make o kona uhane kana i hana'i." Solomona 7: 27. "Ma ka hale o ka wahine hookamakama ke ala e hiki ai i ka po, e iho ana ilalo i ka make." Solomona 9: 18 "Aole i ike kela malaila ka poe make, aia kona poe hoaaina ma ka hohonu o ka lua."
                O ka hoopai ana o ke Akua i ka poe moe kolohe i ka la mahope. Pehea ia? Aole e loaa ia lakou ke aupuni o ke Akua, 1 Korineto 6: 9. "Aole anei oukou i ike, aole e loaa i ka poe hewa ke appuni o ke Akua? Mai kuhi hewa oukou; aole ka poe moe kolohe, aole ka poe moe aikane, aole ka poe Sodomi, aole e loaa ia lakou ke aupuni o ke Akua." Galatia 5: 19—21. "A ua akaka ae la na hana ana o ke kino; oia ka moe kolohe, ka hookamakama, ka mea paumaele, ka makaleho—O ka poe e hana ana i ua mau mea la, aole e loaa ia lakou ke aupuni o ke Akua." Epeso 5: 5. "Ua ike oukou i keia, aole ka mea moe kolohe, aole hoi ka mea haumia, aole loa o lakou noho ana i ke aupuni o Kristo, a o ke Akua." Hebera 13: 4, "E hoahewa mai ana ke Akua i ka poe hookamakama a me ka poe moe kolohe." Hoikeana 21: 8. "O ka poe moe kolohe,—e loaa ia lakou ko lakou puu ma ka loko e aa mau loa ana i ke ahi a me ka luai pele." Hoikeana 22: 16. "Aia mawaho na ilio— (mawaho o Ierusalema hou) a me na pule anaana, a me na moe kolohe."
                E noonoo pono i keia mau pauku i kakauia no ka moe kolohe, i ike oukou, e na 'lii, a me kanaka i ka hope o ia hewa. Aole no ka poe makaainana wale no keia hoopaiia ana, aole loa. No na 'lii a me na kanaka waiwai, a me na luna, a me na kanaka haole kekahi. Oi loa ka hewa o na 'lii; a me na kanaka naauao, ke moe kolohe lakou, a oi nui aku ko lakou poino, a me ka eha ma kela ao mahope.
                I ike nui oukou i ka hewa o ia mea e hoakaka hou au i kekahi mau mea e pili ana i ka moe kolohe, "O ka mea pepeiao e lohe, e hoolohe ia."
Na'u.

Kaneohe, Ian. 20, 1842.
Aloha oe e Limaikaika
                He manao ko'u e hoike aku ia oe