Ka Nonanona, Volume I, Number 16, 1 February 1842 — Page 77

1842.] KA NONANONA. 77

                Penei nae ke kumu o ka hana ana a'u i ike ai; i ke kakahiaka, hoa iho la ua kanaka pope la i ka imu ai, a kalua, a huai, a pau ka ai i ka uhao i ka umeke; hoolue iho la ia i ka lanahu, a ike iho la ia he ahi e a ana i ka lanahu. Kinai iho la i ka wai a pio paha kekahi, pio ole kekahi; hoo iho la i ke poi, kukulu iwaho. Lalau aku la i kahi kihei, hele aku la, a mamao, manao hou i ua poi lanahu la, hoi hou a hiki i kahi o ka lanahu, hoihoi aku la i ka hale, alo ae la kona maka i na kii maloko o kona hale. Kauoha aku la i na kii, "E! e kiai i ka hale o kakou, nanaia ke kolohe; ina he kanaka aihue, poaloia ka onohi. Pela no ka oukou hana i na kanaka kolohe i ko kakou hale; ke hele nei au." Alaila hele aku la ia, mai Hauula aku a Kaluanui, aole i liuliu iho ilaila, o ka pau aku no ia i ke ahi o ka hale, i ke ahi no o ke poi lanahu ana i waiho iloko o ka hale ona. Ike mai la, ua pau ka hale i ke ahi, kaumaha loa iho la ia, aole hiki ke holo mai; hoi malie mai la ia, a hiki; o kona waiwai a pau, ua hana i mau eheu nona a lele aku i ka lewa. Imi ia mai la na waiwai paakiki iloko o ke ahi, a loaa mai la kekahi kii me ke kea; ua hehee ke keleawe i ke ahi, a koe mai ka ihu kahi keleawe: kahea mai la kanaka ia ia, i mai la, "eia kou akua." I aku la ia "ho mai"; haawi mai la lakou; olelo iho la ia i ua kii la, i iho la, "Kainoa hoi he pono ka oukou! aole ka! kauoha iho hoi au ia oukou e malama i ka hale o kakou, anu ke kahu o oukou i ka hale ole." Pela ka olelo a ua kanaka la i ke kii, i haawiia mai ai e kanaka mai loko mai o ke ahi. Oia na

mea au i ike iho nei.
                Auhea oukou e ka poe heluhelu i ka Nonanona? ke ike nei kakou i ka hana a ka pope. Ua paulele nui lakou, ma na mea ike makaia. Make hewa loa kona kauoha i na kii. No ka mea, aole hiki i ke kii ke hoopakele i ka uhane, a pela no ka lakou hoomana ana. Hoomana lakou ia Maria, aole nae hiki ia ia ke kala i ka hala o na kanaka; i ke koko wale no o Iesu, e pau ai ka hala o na kanaka.
                O keia hana, ua like me ka hana kahiko o Hawaii nei. I ka manawa e pii ai na kahuna kalaiwaa iuka, a me ka poe kahiolona, a i ko lakou manawa e hoi mai ai, kauoha lakou i na mea o ko lakou hale i na koi, i na uhi kahiolona, i na moena, a me na wahi paipu; Penei ka lakou olelo, "e kela pali keia pali, nanaia ka hale o kakou; eia makou ke hoi nei, mai lawe i kekahi mea o ko kakou hale, hookaaia i ka pali; Nou ia ka pohaku." No ka mea, he hana hoomana kii no keia, a pela no ka hana a ka pope a kakou e ike nei.
Na KOEKOE.

Hoapiliwahine.

                Ua hala e aku ia, a ua hakahaka kona wahi: auhea la ke alii nana e pani? Aloha ino o Hoapiliwahine!