Ka Nonanona, Volume I, Number 16, 1 February 1842 — Page 78

78 KANONANONA. [FEBERUARI,

He hoahanau aloha loa ia ma Hawaii nei; he inoa maikai kona, me he mea ala la. He nui na makahiki o kona noho ana iloko o ka ekalesia o Kristo me ka maemae a me ka hihia ole. Ua akaka kona haahaa a me kona manaoio; ua makaukau oia i na hana maikai a pau. He nui ka poe aloha ia ia me ka uwe i kona make ana. Ua pomaikai kona make ana iloko o ka Haku i ka la 16 o keia malama. "E ake au e make i ka make ana o ka poe pono; i like hoi kuu hope me kona."
                E na'lii o Hawaii nei, e nana oukou ia Hoapiliwahine; e nana i kona noho ana a me kona make ana. Pehea ko oukou manao? Aole anei oukou mahalo i kona pono? Ua mahalo no oukou. No ka mea, ua hana hou ia kona naau e ka uhane o ke Akua a ua hoohua mai oia i na hua maikai he nui wale. Mai kona wa i huli i ka pono o ke Akua, a hiki i kona la i make ai, aole lohe kakou, ua inu rama, ua moekolohe, a hana i kela hewa i keia hewa. Aole loa. Ua noho haipule; ua hooiaio kona manao ia Iehova kona mea nana i hana, a ua noho haahaa malalo ona. Nolaila e na'lii, he kumu hoohalike no ia no oukou: e hele oukou ma kona mau kapuai.
                Eia kekahi; Kokoke pau loa na'lii i ka make. I keia mau makahiki i hala ae nei ua kii pinepine mai ke Akua i na'lii e lawe aku. Heaha la keia? Aole anei he mea paipai ia oukou e lohe kuoo a me ka makaukau? Ahea la komo ka noonoo iloko o ko oukou naau e haalele loa oukou i na mea ano ino, a e huli i ke Akua? Aia no nae ia oukou; ina manao oukou e paio me ke Akua, e hooikaika malaila, a mamuli 'hiki mai ko oukou popilikia me he puahiohio la.' Aka, ina manao oukou e make i ka make ana o ka poe pono, e mihi haahaa imua o ke Akua, a e lawe wale i ke ola nui ana i hoike mai ai.
                E na hoahanau; o kakou kekahi e nana ia Hoapiliwahine. E like me kona hina ana, pela auanei kakou e hina'i. Nolaila e hoohalike me kona ano kupaa, a me kona haipule, a me kona noho pono ana, i pomaikai ko kakou hopena e like me kona, a e halawai loa me ia ma ke ao o ke Akua.
                Eia kekahi; E palapala nui mai kekahi hoaaloha ma Lahaina, i ka mooolelo o Hoapiliwahine, mai kona wa uuku mai, a me kona ano Keristiano kekahi. I akaka ka nani o ka ke Akua hana ana iloko ona, a e mahaloia no hoi ia e na kanaka a pau.

NA MOKU

                I ka la 25 o Ian. Ku mai kekahi moku Beritania o Kolumebia kona inoa, mai Kolumibia muliwai mai; a ua holo pu mai kekahi mau misionari olaila; Eia ko lakou mau inoa, o A. B. Kamika me kana wahine, a me Mi. Kona me kana wahine. He mau kahuna pule na kane; nawaliwali na wahine elua. No ka nawaliwali o na wahine ko lakou haalele ana i kela aina.
                Ua hoi mai no hoi kekahi hoahanau wahine no Oahu nei.
                He mau haole e ae kekahi i holo mai maanei.
                Kokoke hiki mai kekahi mau alii Beritania no ka poe kalepa ma Kolumebia. Aia ma ka moana.
                Hookahi moku kohola maanei i keia wa: o Braganza kona inoa. He kahuna pule kekahi maluna iho o ia moku.

                I ka la 22 o Ian. holo aku ka moku kalepa o Glouceste ka inoa, i Amerika. Holo pu maluna, o Iawika me kana wahine me ke keiki, a me Mi. Kalakina.

Na LIMAIKAIKA e hoopuka'ku.