Ka Nonanona, Volume I, Number 18, 1 March 1842 — Page 84

84 KA NONANONA. [MARAKI,

lii, a makaikai, a launa nui pu me ka poe kolohe. Nui ka poe kolohe malaila. O ka poe moe kolohe, a me ka poe aihue a me ka poe a pau i hihia ma ke kanawai o ka aina, aia malaila, a nui na mea ino, a me na mea haumia i hanaia malaila. I mai la ia'u kekahi hoahanau, he kanaka eka ia, i mai, "I ko'u hele ana i kahi wili ko, e hana i ka'u hana, nui ko'u kaumaha, i ko'u lohe i na mea inoino loa. Anene hiki ole ia'u ke hoomanawanui i ka ino. Makemake au e pani i ko'u mau pepeiao." Aole hiki ia'u ke huna i ko'u makau i ka pono ole, a me ka ino maoli o Wailuku nei, no keia hana aha. O na Pake, he poe malama ole i ka la Sabati. He poe pili waiwai kekahi. Aole loa lakou hana ma na mea e pono ai ka aina, a me ke aupuni. A nui na kanaka maoli mamuli o ia poe. Nui ka poe makua makemake e maleia ka lakou mau kaikamahine me ka poe Pake, no ka mea, ua ikeia, he poe waiwai lakou. No keia mau mea, i ko'u manao, ma ko ke Akua kaupaona ana i ka hewa, a me ka maikai o ka hana ko ma Wailuku nei, ua mama wale no ka maikai, ua kaumaha loa ka ino. E ike auanei kakou i ka oiaio i ko'u manao. Na'u na GELINA.

Honolulu, Oahu, Feb. 7, 1842.

KAMAILIO NO NA MEA ONA, A ME KA INUWAI.

                Ona. Heaha ka maikai o'u ke inu au i ka wai wale no, aole i kekahi wahi mea ona.
                Inu wai. He mea ono maoli ka wai, a he mea e oluolu ai, a he mea hoi e ulu ai ke kino o ke kanaka; a o Adamu, me kana wahine, o ko laua mea inu no ka wai, a o ko laua waina no hoi ia, a me ko laua mea ona. Heaha ka hewa o ka wai ia oe?
                O. He hewa ka wai wale no i ko'u manao; aia hui pu ia ka wai me kahi mea e'ae, alaila, maikai; i hiki i ke kanaka ke hohio, a olioli no hoi no na mea ana i hana ai.
                I. W. He kanaka hana pololei anei oe? E hiki anei ia oe ke hana i na hana o ke aupuni? Ina i maloo ka aina, e hiki anei ia oe ke hookahe i ka aina, i ulu ai ka ai, a me na mea ano maikai a pau, i ka wai awaawa?
                O. Aole hiki ia'u ke hookahe i ka wai awaawa i na mea kanu a pau; aka, i ke kanaka wale no e hiki ai.
                I. W. He kupanaha ka oe! Manao anei oe, o ka wai awaawa, oia ka mea i ulu ai o kou kino?
                O. Aole au i manao pela.
                I. W. Heaha kou manao i kou kino; i ka nini mau ana i ka wai wela, bailaia?
                O. Eia ko'u manao no ko'u kino, i ka wai i bailaia. He wela loa, a poholehole ko'u ili.
                I. W. Ae; oiaio ka! He pono kau olelo: hewa ka wai wela, a pela no hoi ka lama.
                O. Heaha kou manao no'u? a heaha kau e hoohulihuli mai nei ia'u?
                I. W. E ake au, e lilo oe, a me au, i wai ko kaua mea ona; a oia hoi ko kaua mea e luu ai, no ka mea, ke olelo mai nei oe, he wela hoi oe i ka wai i bailaia, nolaila, he pono anei ka wai i bailaia, ke nininiia maluna ou?
                O. Aole o'u makemake ia wai wela i bailaia.
                I. W. Heaha kou manao no ka rama?
                O. Aole o'u manao ua like ka wai i bailaia, me ka rama.
                I. W. No ke aha la i like ole ai i kou manao?
                O. No ka mea, aole au i make koke i ko'u wa i inu ai, e like me