Ka Nonanona, Volume I, Number 19, 15 March 1842 — Page 87

KA NONANONA
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.
Buke 1. HONOLULU, OAHU, MARAKI 15, 1842. Pepa 19.

WA SETONA.

                He kanaka kaulana loa o Geogi Wasitona ma Amerikahuipuia. He pookela ia ma ia aina nui, a ua lohea no hoi kona inoa ma na aina naauao a pau.
                I ka makahiki 1732 a i ka la 22 o Feberuari kona manawa hanau. Nolaila hoomanao ko Amerika lahuikanaka ia ia ma ia la o kela makahiki a me keia makahiki; ahaaina lakou, a hookani i na pu a me ka hauoli no ka la hanau o Wasitona. Nolaila ke kani ana o na pu i keia mau la iho nei, ma ka papu o Honolulu nei.
                I ka makahiki umi o Wasetona, make kona makuakane, a o kona makuwahine wale no ka mea malama ia ia me ke ao aku ia ia ma ia hope mai. Makaala loa kona makuwahine i ka malama ia ia, aole ona molowa iki, no ka mea, he wahine naauao loa ia.

KONA ANO I KONA WA OPIOPIO.

                Eia ka mea i oleloia, aole ike o Wasitona i ka hoopunipuni kona wa kamalii; aole loa. I kona wa hele i ke kula, paulele na kamalii hoapaani ona a pau i kana olelo; no ka mea, ua ike lakou aole ona ike i ka hoopunipuni; he oiaio maoli kana olelo. Ina paha hoopaapaa a hakaka kekahi, mau keiki, hoopii koke lakou ia Wasetona, a nana e uwao; o ka pau no ia o ka hakaka.
                Eia hoi kekahi kaao nona i kona wa opiopio. He lio hou a me ka maikai ko ka makuwahine ona; aole i eeia ua lio nei. Manao iho la o Geogi e hopu i keia lio a e hooholo ia ia me ka lohe ole o kona makuwahine. I kakahiaka nui, kii aku la ia i ka lio me kekahi mau keiki hoapaani; hookomo iloko o ka pa, a hana i ke kaulawaha a paa; o ka lele koke no ia o Wasetona maluna o kona kua. Holo ikaika loa ka lio a me ka lelele io ia nei; aole nae haule iki o Geogi ilalo. Makaukau loa ia i ka holo lio. Aka hoi, no ka ikaika loa o ka lele ana, haule iho la ka lio ilalo a make loa. Moku paha kekahi aa koko, a pau koke ka hanu.
                Lumilumi mai la na keiki, a nana i kahi lio maikai loa, ua make; minamina loa lakou. I aku la kekahi keiki ia Wasetona, pehea kou makuwahine? Kaumaha loa auanei paha kona manao. Hoi nui ma la lakou i ka hale e ai; aia lakou e noho ana ma ka papa aina, ninau aku la ka makuwahine, "Ua ike anei oukou i kou wahi lio maikai?" mumule lakou a pau, no ka mea, ua ku ka hewa imua o lakou. A liuliu iki iho, pane aku la o Geogi, me ka maka kaumaha, "ua make kou lio ia'u:" hooholo ae nei au, a no kona lele ana, haule ilalo a make koke iho no. Ua hewa wau." Pela kona hai pololei ana i kona hewa me ka huna ole, a me ka hoopunipuni ole.
                Nana aku la ka makuawahine ia ia me ka maka oluolu, i aku la, "E auhea oe, e kuu keiki, ua minamina io au i kuu lio maikai, aka, oluolu au ia oe, i kou hai pono mai ia'u i kau hana ana; aole oe i huna a hoopunipuni mai ia'u; nolaila, ea, oluolu au ia oe." Pela ka makuwahine.