Ka Nonanona, Volume I, Number 19, 15 March 1842 — Page 90

90 KA NONANONA. [MARAKI,

KA HEWA MA KAUAI.

Auhea oe e ka Nonanona.
                Ua kauoha mai oe, e hai aku makou i ka hana a na lunaauhau.
                Eia makou ke hai aku nei; i ka hana a keia lunaauhau, ma Koolau o Kauai nei. Ua auhau mai oia ia makou, i kukui no ka aina ma Koolau nei. A loaa ke kukui, hai aku makou ia ia, o kana olelo mai no ia, e hali makou ma Koloa. Aole i ka la paahao, aole hoi i ko na konohiki, ka hali ana; i na la makaainana no.
                Penei ka hali ana. Hele aku nei makou o moe i Puna, akahi la; kakahiaka ae hiki i Koloa, alua la; moe malaila, akolu la; hoi mai i Puna, aha la hiki makou i Koolau nei.
                Eia kekahi; penei ke kuai ana i ke kukui ma Kauai nei. Ma Koolau nei $1.50 no ka pahu hookahi; ma Koloa $2 no ka pahu.

Na ka poe o Koolau, KAUAI.

                E ua luna nei, auhea oe? Ke ninau aku nei au ia oe, he pololei anei kela olelo maluna iho? Ina he pololei kela hoakaka ana, ua hewa loa oe; ua hooluhi wale oe i na kanaka, a ua lawe wale i ka lakou. Aka, ina ike oe, he kekee keia olelo maluna, e hoakaka mai oe, i maopopo kau hana ana.

Waikiki waena, Maraki 5, 1842.
                E ka Nonanona e; aloha oe ka mea e hele hookahi nei ma keia mau mokupuni o Hawaii nei. Ke hoike aku nei au ia oe i kau olelo ana mai, e koho aku no ka Niu kamahao ma Lahaina.
                Ua manao iho nei au i kela Niu kamahao ma L. lalo, aole he niu maoli, aka, he kanaka ke ano o ia niu, he alii nae, no keia mau moku puni no ia. He alii hanohano, kiekie maoli no; maikai no kona noho ana, aole ona wahi inoino iki. He pookela oia no Hawaii nei. Maikai maoli kana hana ana; lokomaikai maoli kela alii i kona mau ohua. Ua pomaikai maoli oia i keia wa.
                O HOAPILIWAHINE ka inoa o ua niu kamahao la; ua hoopiliia nae e like me ka laau maikai o L. No kona hanohano a me kona malama maoli i kona ola, kona mea i hoomaikai ia ai, a i hoopili ia ai hoi ma ke ano o ka laau maikai. Oia ke ano o ia niu kamahao he kanaka he alii nae. Na K.

HE MEA HOAKAKA.

                He alanui laau ko Hooliliamanu ma Waiawa, o Ewa: aole pono e pii wale na kanaka ma ua ala la me ka uku ole. He hapaha ka uku no ka makahiki hookahi, no ke kanaka. Ina i pii malu wale me ka huna, $5 ka uku. HOOLILIAMANU.

KA BAKA.

                                E ka baka, lapuwale,
                                Lau kolohe, lapuwale,
                                Haku o ka poe hewa,
                                Akua hanai, hele pela.

MAKE.

                I ka la 13, make ka wahine moe kolohe a Keoni Pake. Ua oleloia, ua inu i ke keleawe, a make koke iho.

NA MOKU.

Maraki 4. Ku mai ka moku kiakolu, o Delaware ka inoa, no Bosetona mai. O Kaka ke kapena.
                " 4. Ku mai ka Nevius, no Salema.
                " 8. Ku mai ka Lama no Paniolo mai.

KA UKU NO KA NONANONA.

                O ka poe haawi ole mai i ka uku, e haawi koke mai, o panee hou, a papalua.

NA LIMAIKAIKA e hoopuka'ku.