Ka Nonanona, Volume I, Number 21, 12 April 1842 — Page 96

96 KA NONANONA. [APERILA,

i ka waiwai ole. Aole hoi pono ke hookaumaha loa i na makaainana a maule lakou. Nolaila, i ko'u manao, o ka auhau i na haole a pau ka pono."
                Ninau aku kekahi, "Pehea ka auhau pono?" I mai kela, "Penei ka auhau pono; ma kekahi waiwai, e auhau uuku, hookahi keneta paha no ke dala hookahi; a o kekahi waiwai hoi, e like me ka rama, ka waina, ka baka, a me kekahi mau mea e ae, e auhau nui; e auhau no hoi i na pa a me na hale a me na holoholona."
                Kahaha mai la kekahi hoaai, "Kahaha! aole pono iki makou ke hana na 'lii pela; no ka mea, ua waiwai keia aina ia makou; no na haole ka hanohano a me ka lako o na 'lii a me na makaainana."
                Ae aku la kekahi, "Ae, he oiaio no, ua waiwai keia aina ia oukou a ua waiwai no hoi oukou i ka noho maanei. Ina i laweia ka waiwai o nei aina i Ladana, a i Nu Ioka paha, aole anei e auhauia? Ina i holo aku kekahi kanaka o Hawaii nei a noho ma Bosetona e kuai, a e huli waiwai, aole anei e auhauia kela kanaka a me kana waiwai? pau loa i ka auhauia, a heaha ka hewa, ke hahai na 'lii mamuli o kela mau aina naauao, a e auhau i na haole e noho ana maanei?"
                Pela wale no keia paio ana, a pau na hora elua paha, a hoi nui makou.
                E na kanaka noiau, e hiki ia oukou ke noonoo, owai ka mea manao pono o keia mau haole? E ka poe huli kanawai ma ka ahaolelo alii, pehea ko oukou manao?

                O ka makau ia Iehova, oia ka mole o ka ike.
                Hoowahawaha ka poe lapuwale i ke akamai a me ke aoia mai.

KEKO.

                Aia ma Nu Ioka he haole nona ke keko. Nui ka waiwai o ke keko ia ia; nolaila aole ona makemake e kuai aku ia ia. I ka hele ana o ua haole nei i ka ululaau e imi i na holoholona hihiu, a i na hua o na laau paha, hele pu no ke keko me ia. Pii mama aku la no ia i na laau, a hele aku no ia ma na lala, e hoohalulu i na hua, o ka haule no ia i ka honua; ina pakiki kekahi hua, alaila e hahau no oia ia mea me kona pupu lima, o ka haule koke no ia.
                I kekahi la e hoi mai ana ka haole me kona keko, mai ka ululaau mai, hele no ua haole la iloko o ka hale kuai rama e inu rama. I kona inu ana i ka rama i kawiliia me ke ko, koe no kahi rama a me ke ko iloko o ke kiaha; haawi mai no ka haole i ua koena la i kona hoahele, i ke keko. Inu no ua keko la me ka ono no. Aka aole liuliu a e lele ana ke keko i o ia nei, no ka ona pupule; a akaaka na haole inu rama.
                Manao no ka mea nona ke keko, e nana hou pela i ke kakahiaka ae, a e alakai mai i kekahi mau haole inu rama e nana pu, a e hauoli pu i ka ona pupule o ke keko. Kakahiaka ae, hele no ua haole la e hanai i kona keko. Akahi wale no ka launa pono ole mai o ua keko la i kona haku. Aole ona puka pono mai, noloko o kona wahi moe, e like mamua. Nolaila nana ae la ka haole iloko o kona hale moe, aia la.