Ka Nonanona, Volume I, Number 21, 12 April 1842 — Page 97

1842.] KA NONANONA. 97

e moe ana me he mea make la! Hea aku kona haku ia ia peneia, Ea; Jack! (oia no kona inoa,) e ala mai; a e puka mai e ai. Ala iki mai la o ua keko la, a noho ma kona mau wawae hope, anai oia i kona mau maka, e lomilomi i kona poo, alaila maopopo he nui kona nalulu. I mai la kona haku peneia, "Ua akaka pono ia'u kona eha, no ka mea, pela io no wau i na manawa he nui wale; ona wau mai ka po a ao, a nui loa ka nalulu o kuu poo. A hala na la elua, ekolu paha, ua ola hou ua keko la. Alaila manao kona haku e hooakoakoa i kona poe hoa inu rama i ka hale kuai rama, a e hana uhauha me ua keko la. Ua hea pakahi lakou i kiaha rama. I aku hoi ka mea nana ke keko, "I hookahi kiaha okoa no Jack." Nana ae la o Jack i ka mea e kawili ana i ka rama me ke ko, a nui kona haalulu a me kona makau. A makaukau kona kiaha, i aku la kona haku ia ia. "Ea! e Jack! auhea oe? E inu pu kakou a pau loa. Akahi wale no ka hookuli ana o ua keko la; aole ona makemake e inu hou i ka mea e ona ai. Manao no kona haku e hopu ia ia, a e hoohainu ia ia. Aka, ua puka koke oia iwaho, a pii aku la ia maluna o ka hale kuke a noho ma ke kaupaku. Lalau kona haku i kekahi laau, a hahai aku la ia ia mawaho; a hoohalulu oia i ka laau ia ia i kona noho ana maluna o ka hale, e olelo ana hoi, e hahau nui no au ia oe, ke iho koke ole mai oe a inu i kou kiaha rama; aole nae ia i iho mai.
                Alaila kii no ka haole i kona pu, a hooweliweli ia ia peneia, "E ki koke aku au ia oe i ka pu a make oe, ke iho ole mai oe ilalo nei."
                Makau no ua keko la i ka pu, nolaila holo oia ma kela aoao o ka hale. Imi aku la kona haku i elua mau haole okoa me ko laua mau pu e kokua mai ia ia. Ku kekahi ma kela aoao o ka hale me kona pu, a o kekahi hoi ma keia aoao o ka hale me kona pu, a hooweliweli hou mai lakou ia ia, e iho koke mai, i ole, ua make loa i ka pu. Aka, aole manao o ua keko la e make i ka pu, aole nae manao e inu i ka rama. Nolaila i kona ike ana he haole ma kela aoao keia aoao o ka hale me kona pu, lele koke ia maluna o ka puka uahi o ka hale kuke, a komo iloko, a pakele ia lakou.
                Nani ka naauao o ua keko la. Ua oi aku kona pono i ko ke kanaka inu rama. Hookahi wale no kona inu ana i ka mea ona, o ka haalele loa no ia.
                E na kanaka inu rama, a me na mea ona e ae, e hele oukou i ka puaa, a i ke keko hoi, e nana i ko laua aoao a e hoonaauao iho.

Hilo, Feb. 26, 1482.
                Auhea oe e Anonanona; ua nele iho nei makou i ka hale pule ole; i keia mau la. Ua hina iho nei ko makou hale pule.
                Eia ka makou halawai i ka hale kula o Laimana i keia manawa.
                Ke kukulu nei nae ko makou hale pule hou; ua oleloia, he hale laau ke ano, ua paa na pae pou a me na kaola, a me na kia oloko; o ke oa wale no koe, no ka piliki loa o keia mau la i ka ua, ka mea i paa koke ole ai; oia paha ka mea e hakalia ai: o ka loa 22 anana, o ka laula 19 anana.
                Eia na kala i ukuia aku ai i na kamana, $400. No kina ke kamana, a me kekahi mau kanaka maoli elima.