Ka Nonanona, Volume I, Number 21, 12 April 1842 — Page 98

Page PDF (221.28 KB)

98 KA NONANONA. [MARAKI,

 

Eia ko'u wahi ninau ia oe e Anonanona.
                Heaha na mea kapu i ko ka poe aia aoao? Aole anei i like kekahi ano o ko ka pope aoao pela? i mai lakou, he pono no ka poe ona, a me na mea lealea a pau.
                Ua hoike mai ka Palapala Hemolele, aole e komo ka poe ona iloko o ke aupuni o ka lani.
                Auhea oe, e Anonanona, ke hoike mai nei oe i na hana lapuwale o ia aoao, e hoike hou mai oe i na ano like ole a pau. Na KAAPA.

                E Kaapa; eia na mea kapu ma ko ka pope aoao, o na mea noa i ke Akua; a o kekahi mau mea kapu i ke Akua ua noa ia lakou. He kapu ka ona i ke Akua, aka, aole kapu ia lakou. He kapu ka hana lealea i ka la Sabati i ke Akua, aole nae kapu ia i ka poe pope. Hoohakaka bipi, a hoohakaka moa, ka poe pope ma Paniolo i ka la Sabati; pili waiwai kekahi, maika, paani, pepa, o na Kahunapule kekahi hana pela. Hele no i ka mesa a pau, hele nui i ka hana lealea. Pela ma na aina pope.
                Ma na mea aole i kauohaia mai e ke Akua, ikaika lakou, aole ai i ka io holoholona i na la po alima, a me na la he 40 o kela makahiki, keia makahiki. Hoeha wale i ko lakou kino, me ka manao e pau ko lakou hewa malaila. Pule ia Maria, ia Petero, a me na mea he nui.
                Aole nae i aoia mai pela e ke Akua.

KA WAHAHEE.

                I ninau aku kekahi ia Aretotela, "Heaha ka waiwai i ili mai i ke kanaka, ma kona hoike aku ana i ka wahahee?" I mai la kela, "Aole e manaoia he oiaio kana olelo ke hoike mai oia i ka mea oiaio."

KA MANAOLANA.

                O ka manaolana e noho pomaikai ma kela ao aku, he mea ia e oluolu mau ai na kanaka pono. Iloko o ka pilikia, oia ke hoohauoli i ko lakou naau; iloko o ka hoowalewaleia mai, oia ke hookupaa i ko lakou pono; a iloko o ka make, oia no ko lakou mea e hiki ai ke olelo iho, "E ka make, auhea kou huelo awa? e ka lua, auhea kou lanakila?"

MAI AKAAKA OE I KA HEWA.

                Aole pono e akaaka i ka hewa. Ina e ike aku oe i kekahi hana hewa, mai hoaponoa aku; mai kokua aku. Ua palapalaia e Solomona, "AKAAKA KA POE LAPUWALE I KA HEWA."

KA HIMENI
KA UA.

                He ua, he ua, e holo kakou
                Iloko o ka
hale, ma kahi malu
                He nui ka ino iluna, ilalo,
                E holo kakou, mai kali iwaho.

                Ka! ke kali oukou, paani hoi?
                Kamalii hewa, poino auanei,
                E holo mai hoi, i malu kakou,
                He ua holua, keokeo no.

                Ka poe ilihune, aloha lakou,
                Kulu ka hale, popopo ka mauu,
                Aole he kapa, aole he ai,
                He nui ka ua, uwe na kamalii.

                He maikai ka ua, e ulu ka ai
                Makana io, mai luna mai,
                Lako ko uka, lako ko kai,
                Oki ka aina, ke ole ka wai.

                E kamalii e, hauoli kakou;
                E kapai i ka mea, ia ia na ao,
                Nona mai keia, a nona mai kela,
                Ka ua, ka ai, ke anu, ka wela.

NA LIMAIKAIKA e hoopuka'ku.