Ka Nonanona, Volume I, Number 24, 24 May 1842 — Page 121

1842.] KA NONANONA. 121

                Oia hoi, 5 setadia, 5 kaulahao, 9 anana.   Na G. L. KAPEAU.

LAHAINA.

                I ka la 26 o Aperila, 1842, halawai nui na'lii a me kanaka o Lahaina, ma ka luakini, a kakau iho na 'lii a pau a me na hulumanu a me na kanaka i ko lakou inoa ma ka palapala hoole i na mea inu a pau e ona'i.
                I ka la 16 o Mei, 1842, halawai hou ka poe hoole i ka inu rama ma Lahaina, a koho lakou ia Kamehameha III. i Lunanui a me D. Baluina i Kakauolelo.
                He mau luna paipai malalo o Kamehameha III. o Paki, Keoni Ana, Ioane Ii, D. Malo, A. Moku,
                Na keia poe ehiku e hana i ka hana nui o keia poe hui; na lakou e imi i mea e ikaika'i a e kupaa ai ka poe maloko; na lakou e hooikaika i na kanaka mawaho e kau i ko lakou inoa; na keia poe hoi e hookolokolo i ka hewa ke akaka ole, a na lakou e holoi i ka inoa o ka mea hewa. I ka imi ana i mea e pono ai, ua hooholo like ia keia mau manao.
                1. Ina kau kekahi i kona inoa ma ka palapala hoole rama, a mahope inu i ka mea ona, alaila e holoiia kona inoa, o hilahila auanei ka poe e noho pono ana me ka inu ole. Aka, ina manao oia e kakau hou i ka inoa, e ae ia'ku no oia ke hana pela. A ina inu hou oia ma ia hope, alaila, i ka lua o kona inu ana, e holoiia kona inoa, a e paiia ma ka Nonanona.
                2. Eia ka lua o ka olelo i hooholoia. Ina ike kekahi o keia poe hui i kekahi mea o kakou e inu ana i na mea ona, e hai koke no ia i na luna e like me kona ike. A ina he lohe wale no kona, a mahui iki paha, pono no ia ia ke hele a ninan, i akaka ka oiaio. Ina i huna kekahi i kona mea e ike ai, a me kona lohe, a hana paha ma ke ano ku e i keia olelo, alaila, e holoiia kona inoa, e like me ko ka mea i inu. I ka wa e hewa ai kekahi, na ka luna no e holoi i kona inoa ma ke akea.
                I keia halawai ana, ua nui na mea i hai mai i ko lakou manao. O D. Malo, o Mika Dibela, o Ioane Ii, o Kamehameha III. Kekauluohi, o Kekauonohi, o Daniela Ii, a me kekahi mau mea e ae, a maikai loa na manao i haiia mai.
                A pau na manao i ka haiia mai, alaila, hooholoia ka olelo, e halawai hou i ka la Monede, 13 o Iune.
D. BALUINA, Kakauolelo.

AHAOLELO MI SIONARI.

                I ka la 13 o keia malama (o Mei,) komo makou, o na misionari Amerika, iloko o ka ahaolelo makahiki o makou, a malaila makou e noho nei i keia mau la. Eia na inoa o na kahuna pule a me na kumu ao.
                Kauai; o Wini, Gulika, Alekanekero, Lapona, Ioane.
                No Oahu, o Bihopa, Emesona, Loke, Pareka, L. Kamika, Kamalena, Holo, Kanapa, Dola, Daimana, Limaikaika, a me A. B. Kamika.
                Molokai. . . . . . . .
                Maui, O Kalaka, L. Aneru, Bele, Rise.
                Hawaii, S. L. Aneru.
                Mei, 19. I keia mau la ua pau i ka heluheluia na mea a na misionari, i hana'i, a i ike ai hoi, iloko o keia mau malama mai kela Mei a hiki i keia Mei. Eia kekahi mau mea maopopo a'u i lohe ai.
                1. Ka lokomaikai o ke Akua. Ua malama pono ke Akua ia makou me kona ahonui, i keia mau malama i hala ae nei. Aole nui loa ka mai, a me ka make; a ua oluolu hoi ka