Ka Nonanona, Volume I, Number 24, 24 May 1842 — Page 122

122 KA NONANONA. [MEI,

noho malihini ana ma keia pae aina. Ua hiipoi mai ke Akua i na kane a me na wahine a me na keiki. Mai kela ahaolelo a hiki i keia, hookahi wale no misionari i make (o Manawahine no Molokai) a elua keiki. Ua nawaliwali no nae na kino o kekahi poe.
                2. He nui ka hana a na misionari. Ua akaka keia ma ka hoike ana a na kumu a pau. Ikaika na kahu ekalesia i ka paipai, a me ke ao aku, a me ka hoike aku i ka olelo a ke Akua ma kela wahi, keia wahi. He nui ko lakou kaumaha i ka hihia o na hoahanau hokai; ua hauoli no hoi lakou i ke kupaa ana a me ka noho maemae ana o kekahi poe. Aole molowa iki lakou i ka huli i na uhane auwana o ko Hawaii nei poe kanaka.
                Ikaika no hoi na Kumu ao i ka lakou hana. Ua holo lakou ma o a maanei e hooponopono i na kumu a me na haumana; a e paipai i na luna a me na makua. Ua ao kula no hoi lakou i kela la i keia la, ma ko lakou wahi e noho ai. Ua ikaika no kekahi poe i ka lapaau, a o kekahi i ka paipalapala, me ka hoopaa buke.
                3. Na ekalesia. Elua ano o na ekalesia o Hawaii nei, he malu a he haunaele. O ka malu no nae ke ano nui i keia makahiki i hala ae nei. O ka palaka kekahi hewa nui o na hoahanau i hoikeia mai; Ua paa loa kekahi poe i ka hiamoe. He nui loa lakou, a ua kaumaha na kahu ia lakou. Ua makaala kekahi poe a ua ikaika no hoi mamuli o ke Akua. Ma Kona, ma Hawaii, ua ulu nui ka pono o ke Akua i keia makahiki. Ua hana maopopo ka uhane Hemolele malaila.
                Eia na hewa e haunaele ai na ekalesia, o ka hana a ka poe Pope, o ka rama, a me ka moe kolohe.
                4. Ua keakea nui ia ke aupuni o ke Akua i keia wa i hala ae nei. Eia ka mea keakea nui, o ka poe mamuli o ka Pope. Ua kau liilii keia poe keakea, mai Hawaii a hiki i Niihau. Aole nae nui ma Maui a me Molokai. He poe makaala loa keia poe Pope; he poe maalea, mokuahana, ku e i na 'lii a me na luna. Hoohaunaele lakou i na kula, a me na ekalesia, a me ke aupuni o Kamehameha III. Hai aku lakou imua o na kanaka i ka euanelio e, a me ka hoopunipuni. Ua hahai kekahi poe mamuli o na kumu Pope, aole nae he nui loa. O ka poe naaupo, ike ole i ka palapala, a me ka poe puni lealea, a me ka poe manaka i ka pono o ke Akua, a me ka poe hoohalahala i ke komo ole iloko o ka ekalesia. Pela ka hoike ana mai o na kumu a pau.
                5. Na kula. Ua pono iki na kula mai Hawaii a Niihau; Ua mahuahua na haumana; ua holo mua ka naauao; mahuahua ka poe ike i ka heluhelu a me ke kakau lima, a me ka helu. Hookahi hemahema nui o na kula mai Hawaii a Niihau, oia hoi, o ka uku ole ia o na kumu. Aole i uku pono ia na kumu, a nolaila ua nawaliwali na kula.

KA MAKE.

                I ka la 17 o keia malama, make ke kaikamahine hou o Keaka amala (J. Colcord). Aole liuliu kona mai ana, elima la wale no, a hele aku la. O ka hi, e like me ko ke keiki a Kamika, oia kona mai. He nui keia mai maanei i keia manawa. Ua oleloia, eono keiki i make koke iho nei, iloko o ka pa hookahi ma Honolulu nei i keia mau la. Ka hi no ka mai e make ai.

NA LIMAIKAIKA e hoopuka'ku.