Ka Nonanona, Volume II, Number 3, 5 July 1842 — Page 12

12 KA NONANONA. [IULAI,

lealea a pau o na haole. Pili loa au i na haole. Aka, ua pau ka manao nui ia mau mea. Ina hiki mai na haole e launa mai ia'u, he wai huihui ka mea e loaa ia lakou. Pono au e hele imua ma keia hana maikai; pono au e lilo i makua, ma keia hana, no kanaka a pau o keia aupuni. O ka haalele loa i na mea ona a pau, oia ka hana maikai, Malaila au a make." Pela ka ke alii.
                Eia kahi mau manao i hooholoia ma ia halawai.
                1. E halawai hou keia poe ma Sepatemaba, i ka la 12.
                2. Koho makou ia Mi. Rikeke i mea hai mai i ka olelo ma ia halawai.
                3. Koho makou ia Kamehameha III, i mea palapala i ke alii nui o Amerika Huipuia, e nonoi ia ia e hoopau i ka haawi rama ma na moku manuwa o lakou, i like pu lakou me kakou, ke holo mai ia mau manuwa ma Hawaii nei.
                Oia na hana ma keia halawai.
Na BALAUINA, kakau olelo

KINAI RAMA.

                Ua holo na hana kinai rama i keia wa ma Lahaina a me Honolulu. Ua malu loa Honolulu, aole haunaele iki, a ua nui ka poe hoohiki e haalele i na mea ona. Olioli loa ka naau i ke ku paa ana o na'lii, a me ko lakou ikaika i ka kinai i keia mea ino. E hoomaikai ke Akua i ka lakou hana e hana nei.

MOKU ILI A NAHAHA.

                I ka la 23 o Iune nei, ili kekahi moku okohola ma Waimea, Kauai. O Jefferson ka inoa o ua moku nei, a o Cash ka inoa o ke Kapana, aole lohe maopopo makou i ke ano o ka ili ana. Eia nae ka mea a makou i lohe maopopo ai, ua ili i kona komo ana iloko ke awa. He nui ka aila Kohola maluna iho. I ko makou lohe, he 2200 barela! minamina ino ka waiwai maikai! Ina he rama, aole minamina ke pau i ka palemo iloko o ke kai. Aka, he waiwai maikai ka aila, e pomaikai ai ke kanaka.

LUAKINI HOU MA HONOLULU.

                Ua paa keia luakini, a ke hoomaemaeia nei i keia mau la. I ka la 13 o Iulai, oia ka la komo ke ae mai ke Akua a me ka hoolaa aku. He pule hoomau ia mau la. Pomaikai makou ke iho mai ke Akua a komo pu me makou iloko o kona hale.

MAKE.

                I ka la 20 o Iune, i ke aumoe iho, make, ma Lahaina, o Charles Mc. Donald; oia ka lua o ke keiki a Mi. Makona ma. He keiki aloha nui ia e kona mau makua.

                I ka la 28 o Iune iho nei, hele o Piipii, he kanaka no Honolulu nei i ka hana poalua a ke Alii; He halihali pohaku ka hana no ka hale hou o ke'lii ma Nuuanu. Kii aku la o Piipii i kona pohaku ma kahakai a hoi iuka, a kokoke hiki i ka hale o ke alii, haule iho la a make koke ma ke alanui. Aole ikea kona mai: aole hoi mea ike i kona make ana. Emo ole ka make ana o ke kanaka! Heaha kona ola? He mahu wale no.