Ka Nonanona, Volume II, Number 4, 19 July 1842 — Page 15

1842.] KA NONANONA. 15

NA MEA HOU.

            I ka la 13 o Iulai nei, ku mai kekahi moku kiakolu no Mazetlan (Mekiko) mai a ua lawe mai ia i kekahi mau nupepa a me kekahi mau palapala lima, mai Amerikahuipuia mai. Eia na mea a makou i ike mapopo ai ma keia mau palapala.
          Ua holo mai ka moku, o Victoria kona inoa, mai Nu Ioka mai i ka la 10 o Maraki, e holo ana i Valeperaiso, a mai laila mai i Oahu nei, a mai ia nei aku a hiki i Kolumebia. Aia no maluna o keia moku Mi. Demana me kana wahine, oia hoi ke kahuna pule no na haole ma Honolulu nei: O Mi. Tatina wahine a me kana mau keiki elua, a me kekahi mau kane a me na wahine e ae.
          Eia kekahi: Ua oleloia e holo mai ana kekahi kiakolu o Sarah and Abigail kona inoa, mai Bosetona mai, iloko o Aperila. He mau misionari no Hawaii nei maluna iho ona ke holo mai. Aia paha ilaila o Binamu ma, aole nae akaka.
          Eia kekahi lohe: He kaua ko Mekiko a me Tekesasa: he kaua ikaika loa, a ua pau i ka haoia kekahi mau kulanakauhale o Tekesasa. No ko Mekiko ka manao mua e kaua, a ua manaoia e lanakila ana ko Tekesasa, a pau koke Mekiko i ka hee.
          Eia kekahi; he nui ka paio o ko Beritania a me ko Amerikahuipuia. Paa ka manao o na'lii o Beritania e hookolokolo i na moku kalepa o Amerika, ma kahi kokoke i Aferika, i akaka ka lawe a me ka lawe ole i na nekero o Aferika ma na aina e, e kuai aku. Hoole ko Amerika poe alii, aole make halo i na moku, a ua kokua ko Farani poe alii mamuli o Amerika.
          I ka la 4 o Aperila aia no P. A. Brinsmade, Kanikele Amerika no Hawaii nei ma Wasetona.
          He nui ka pilikia o ko Amerika poe i ke dala, a ua hooili aku kekahi poe he nui loa i ka hewa o keia pilikia maluna o ke alii nui, Tyler kona inoa.

HE NINAU MA KA HELU.

            "Eia keia ninau au e lawe ai ma kela wahi keia wahi mai Hawaii a Kauai, Penei, He bipi, he hipa, he nene ka kekahi kanaka. O ke kumu kuai i ka bipi hookahi $10.00. O ke kumu kuai i ka hipa hookahi $1.00. O ke kumu kuai i ka nene hookahi 1-6 o ke dala. Ua make pono lakou i na dala $100.00.
          A he 100 hoi ko lakou huina a ekolu, ehia bipi a me hipa a me nene?
          E hai mai ka mea noii ike, na kekahi kapena okohola i haawi mai nei ia kakou."

Maraki 30, 1842.
          Eia mai ka ninau a na kanaka ilihune kanu niu ia oukou e na'lii,
          Aia ma ke kanawai hea o ke aupuni o Hawaii nei, kahi i olelo mai ai e kapu ia ka niu a e lilo ia na ke kiaaina ka mea a ke kanaka i kanu ai me kona mau manamana?
          I ka malama o Maraki, 1842. Ua ike au i ko ke alii kanaka e olelo ana i na lunaauhau penei. "E hele oukou e olelo aku i na konohiki aina niu aole a lakou niu, na ke'lii ka niu. Kuakini ko Hawaii kiaaina."
            A lohe na kanaka i keia huaolelo hookapu niu a ke Kiaaina o Hawaii, olelo iho la laua kekahi i kekahi "ka! lilo ana ka ke kumu kuai paleili o kaua i ke kiaaina, aole no o ka niu a ka poe i lako i kahi paleili, o kaua ka hoi. O ke kumu niu hiwa a'u, ua kuai iho nei au i hookahi puaa iwilei a o ke kumu lelo o ka nui ua lima