Ka Nonanona, Volume II, Number 4, 19 July 1842 — Page 16

16 KA NONANONA. [IULAI

ma kapa a lima pau, e kii hou mai auanei kela i ko ia la mau waiwai, no ka mea, ke lilo nei ko ia la mau kumu niu a maua i ae like ai.
          "I aku la kekahi i na hoa ona ua pono e hoihoi aku ko ia la mau waiwai," alaila ae aku la no kela me ka olelo iho penei, ua manao hoi e mehana a e uhi ia hoi ke olohelohe i na mea a ko'u makua i kanu ai na'u aole ka! e anu ana a e poino ana kaua ma keia hope aku. Aloha wale kaua i ka lilo ana o ke kumu kuai pale o ko kaua ili. Ua lohe kaua i ka olelo mua a ko kakou lunaauhau aole e keakea wale ia kekahi mea a na makaainana, a na luna, a na kiaaina a na'lii a na mea kino kanaka a pau.
          Kainoa pela ka pono aole ka! Aia ka e hoomakaukau ana ia kaua e hele i ka nahelehele i wahi e hoa i ka po i loaa ona kapa no kaua e mehana'i, a e pani i kahi hakahaka malalo i ole e pololi, no ka mea, aole wahi e loaa'i o ka ai a me na mea a pau e pono ai ko kaua noho ana i ke aupuni o na'lii.
          Auhea oukou e ka poe i heluhelu i keia manao o na ilihune kanu niu, he aloha nui ko'u ia laua nei a me na mea e ae i like na manao me ko laua nei. E na'lii, mai manao oukou he olelo wale a he manao wale. Aia i Puna o Hawaii na kanaka ilihune i hana ma keia manao a ma na wahi no i kanu ia ka niu a pau.
          Eia kekahi mea e poino o ka aha ole e paa'i na waa o oukou e kekahi poe alii i ke kapu ana ae a kela alii o oukou. Auhea oukou na'lii mai Maui a Kaua, i ai aina i Hawaii? auhea ka aha o ko oukou waa ke kalaiia i Hawaii, o ke olona anei, o ka ilihau anei, o ka aha la anei o ka huehue anei, o ke ie anei o kowali paha? E hoike mai i ka pono, a me ka hewa o keia ninauia e na kanaka ilihune kanu niu a ke Kiaaina i hookapu ai.
Na na Ilihune. K. Niu.

KA MOKU ILI MA KAUAI.

            Ua kokoke pau ka waiwai o keia moku i ka hoopakeleia e na lii o Kauai, a ua pau i ke kuaiia i keia mau la. O ka hapaha o ua waiwai la, lilo no ke aupuni; ua manaoia, e $6000. i loaa mai i ke aupuni malaila. Ua holo aku kekahi mau haole o Honolulu nei malaila, e kuai.

KE KULA MA KA PUNAHOU.

            I ka la 11, o Iulai nei, ua hoomakaia keia kula; 5 keiki hanai iloko, a he 12 na kamalii hele wale no i ke kula. Ua holo maikai kana hana i keia wa.
          I ka la 12 o Iulai nei holo aku o Emesona, ma i Lahainaluna e noho loa ai.

HALE WELA I KE AHI.

            I ka po o ka la Sabati nei, haunaele loa Honolulu nei, i ka wela ana o ka hale pili nui o ke alii: aia ma kahi kokoke i ka hale Kauila kona wahi i ku ai. O ke kukui kona mea e wela ai, aole nae pau loa ka hale; no ka mea, lohe na haole i ke kani ana o na bele a me ka walaau nui o na kanaka, a lawe koke mai i ke Kaa-kinai-ahi o Mr. Berua, a pio koke ke ahi ia ia. Hookahi hoahanau i pii maluna o ka hale e kinai i ke ahi, a haule ilalo, a eha loa, o Nahinu kona inoa.

KE KIAAINA O KAUAI.

            Ua kohoia o Kekauonohi, he kiaaina no Kauai, i keia ahaolelo iho nei, a ke noho nei oia i Honolulu nei i keia mau la, e hoomakaukau ana e holo a e hana i kana hana nui. Ua pale aku ia i ka inu rama a me ke puhi baka.
          Ke kali nei makou i na lii e holo mai Maui mai, a e komo iloko o ka luakini hou. O ka hiki mai koe paha.

NA LIMAIKAIKA e hoopuka'ku.