Ka Nonanona, Volume II, Number 5, 2 August 1842 — Page 18

18                     KA   NONANONA.                  {IULAI

 

pohaku kumu o ke kihi." Tes. I. 2: 13.  "No ia mea hoi i hoomaikai mau aku ai makou i ke Akua, no ka mea, i ka loaa ana ia oukou o ka ke Akua olelo, a oukou i lohe mai ai ia makou nei, aole oukou i apo mai ia me he olelo la na kanaka, aka, he olelo no na ke Akua, he oiaio no ia, o ka mea i hooikaika nui iloko o oukou o ka poe manaoio."

            I.   Nolaila, heaha ke kumu io o ko kakou manaoio ana i ka palapala hemolele?

            D.   O ka hoike  ana o ka Uhane o ke Akua maloko o kana olelo oia ka mea hoike mai ia olelo, na ke Akua mai no ia.  Hal. 119: 105. "He kukui no kau olelo no ko'u mau wawae, a he malamalama hoi ia  ma ko'u alanui.  Sol. 6: 23.  "No ka mea, he kukui ke kauoha, he malamalama   ke kanawai, Heb, 4: 12. No ka mea, he ikaika, he mana  hoi ko ka olelo a ke Akua, he oi nui kona i ka pahikaua oi lua, e o ana a kaawale ke ola a me ka uhane, o na ami a me ka lolo; oia ka lunakanawai no ka noonoo a me ka naau." Pet. II. 1: 19. Eia hoi ia kakou ka na kaula olelo, i hooiaio loa ia; ua hana pono no hoi oukou i ko oukou malama ana ia ; me he kukui la, e hoomalamalama ana i kahi pouli, a wehe mai ke alaula, a puka mai ka hoku loa iloko o ko kakou naau." O na wanana a na kaula i hookoia, a me na hana mana i hoikeia mai; a me ka maikai maoli o ka olelo, a he kumu ia olelo e lilo ai kanaka hewa i poe maikai maoli, oia kekahi mau mea hooiaio mai i ka palapala hemolele. O Iesu kekahi i hooiaio mai i ka palapala hemolele.  No ko kakou ike ana ia mau mea, pono kakou e manao i ka palapala hemolele, he olelo oiaio ia na ke Akua mai. Aole pono kakou e manaoio ia palapala, no ka olelo wale mai a ka Pope a me ka ekalesia paha.

(Aole e pau)

 

KA HOOLAA ANA I KA LUAKINI.

            I ka la 19 o Iulai nei, pae mai na lii no Lahaina mai, ma Oahu nei, a i ka la 21, komo makou iloko o ka luakini hou i ka hora 3 o ke ahiahi. He nui na kanaka i hele mai, he hapa lua paha ka poe komo iloko, o ka hale,  a he hapalua i noho mawaho. He nui na malihini a me kekahi mau haole. He ia olioli nui ia no makou, no ka mea, ua hemahema loa makou i ka hale pule pono ole; akahi no a hemo ko makou pilikia. Ua paiia a ua hoolahaia iloko o ka hale ma kahi pepa okoa penei.

 

"NA HANA I KA WA HOOLAA I KA LUAKINI HOU."

1.  Pule Hoomaka.

 

2.  Himeni.

E komo mai, e Iesu, e,

Iloko o kou hale nei;

E noho mai a launa pu,

E pomaikai mau ai makou.

 

Hoike i kou nani mau,

Ma keia luakini ou,

E pumehana na naau,

Me ke aloha nui nou.

 

Hoopahaohao mai ia makou,

E like me ke ano ou,

E makaukau e noho mau,

Me au haipule i ke ao.

 

Maanei e launa ai kakou,

A pau ua hana nei a pau,

A kuu ka make ia makou,

E launa mau i kela ao.

 

3. Heluhelu Baibala.

 

4. Ka Palapala a ke 'lii.

 

5.  Ninau i ka poe hana hale.

 

6. Pule Hoolilo.