Ka Nonanona, Volume II, Number 5, 2 August 1842 — Page 19
1842.] KA NONANONA. 19
7. Himeni Hoolaa.
E ke Akua e,
E iho koke mai,
Ma keia hale nei,
E noho launa ai,
Ke hoolaa aku nei makou,
I keia luakini nou.
E ke alii nani e,
Ke KAHI-KOLU mau,
He wahi maha nei,
Nou no, a me makou,
Ke hoolaa aku nei makou,
I keia luakini nou.
E noho me makou.
Ma keia hale nei,
Na naau hanau hou,
Kau ia e haawi mai,
E maliu mai kou pepeiao,
Ia makou nei na keiki au.
Maanei e hoomau ai,
Na mamo a makou,
Maanei e halawai,
Na hoaloha ou,
Hoomana, pule, hoomanao,
A pau na wa a me na kau.
E piha loa mai,
Kou luakini nei,
I kanaka maikai,
I kanaka maemae,
E ku maanei na elele ou,
A pau na la a me na po.
8. Olelo Haiao.
9. Himeni.
No ke Akua o ke ao,
Iehova ola mau,
Kukulu kakou nei a pau,
I keia heiau hou.
Aole no na Akua e
I kahe ai ka hou,
A lilo ko kakou waiwai,
No Iesu wale no.
Hoolilo io no kakou,
I keia la maikai,
I keia hale no Iesu,
E noho mau maanei.
Ma kou kokua aloha mai,
E ke Akua e,
Ua paa ka luakini nei,
Nou no ka hoomaikai.
E kaua ka nani ou maanei,
Ma ke kuahu ou,
Maanei makou e kali ai,
A mau, a mau, a mau.
10. Pule Hope.
11. Pule Hookuu.
Ninau mai paha kekahi, heaha ia palapala a ke alii?—-Eia no ke ano o na palapala la, he palapala hoolilo i keia luakini a me kona pa no keia ekelesia mua o Honolulu nei, a me ka poe manaoio like ma ka pono o ke Akua ma keia hope aku a mau loa.
Ku iluna ke alii imua o ke anaina kanaka a hoakaka'ku i kona manao no keia luakini, "he hale no Iehova, wahi ana, kahi e hoomana 'ku ai ia ia e like me keia pule i malamaia e keia ekelesia, aole no na aoao haipule e ae a pau loa'.
A pau ka ke alii olelo, ua ninauia ka poe hana pu i keia hale, i ko lakou manao. Ku pakahi mai na apana, a ninau aku ke Kumu penei, "ua hana oukou i keia hale, nowai'? Pane mai la ka luna, o kela apana, keia apana, "ua hana makou i keia hale no Iehova, a nona wale no." Pau ia, alaila, hoolilo makou i ka hale ma ka pule.
Ia Bihopa ka heluhelu Baipala, a me ka pule hope; Ia Kamika ka pule hoolilo, a ia Limaikaika ka olelo haiao, a me na olelo e ae.
Aia ke pooolelo ma Kinohi Mok. XXIII. 17. Elua manao nui i hoakakaia I. o ka pono e loaa mai ma ka hale pule. II. Ke ano o ka loaa ana.
O Kauka laua o Mi. Holo, na luna himeni, a ua maikai ka himeni ana ia la aole maikai mamua e like me keia. Lealea loa ka pepeiao i ka lohe.
KA WAIWAI I LILO NO KEIA HALE PULE.
Ua haawi ke Alii nui, $4,000.00
Kapa mamaki, 359.75
He oa ua kuaiia 180.00
Dala a na hoahanau me na 'lii 2,426.00
Na haole maanei a ma Amerika 1,800.00
Na dala i lilo no kela mea, keia
mea, liilii i haawiia e ka luna nui
a me ua luna malalo iho, 3,234.25
Dala maoli, $12,000.00
Pohaku 6,000.00
Laau Hawaii 2,000.00
Hana kokua 7,000.00
Pnna, one, wahie 3,000.00
Hui a pau loa, $30,000.00