Ka Nonanona, Volume II, Number 6, 16 August 1842 — Page 24

24 KA NONANONA. [AUGATE,

a me kana mau lunaolelo; aka, o ka poe hoolepope, ua paa lakou ma ia kahua mai ka wa kahiko mai; ua paa hoi lakou i ke Poo, ia Iesu. Nolaila he akaka loa, o ke kahua i paa ai ka poe pono i kinohi, a ma na hanauna a pau, oia kahi e paa mau nei ka poe hoolepope, paa ma ka palapala hemolele, oia ka paa ia Iesu; aka, ua, kapae ka poe pope ma kahi e. Nolaila, na lakou ka hookaawale aku.
          I. Heaha ka mea ino o ka pule o Roma, ka pule pope, i hiki ole i ka poe hoolepope ke hele ekalesia pu me lakou?
          D. Eia na mea ino o ia pule; he aoao naaupo, lapuwale ia, he aoao wahahee, hoopunipuni; he aoao hoomanakii, he aoao e make mau loa ai; he aoao hookahe koko; he aoao mokuahana; he aoao makapo; he aoao hoino i ke Akua.
          I. E hoakaka mai oe ia mau mea ino.
          D. 1. O ka naaupo lapuwale. Aole e pau i ka heluia na mea liilii, lapuwale, i kapaia no ka wa kahiko mai, a ua hookomo lakou ia mau mea liilii iloko o ko lakou hoomana, e like me ka niho o Kristopera hemolele, ke oho o Petero, ka palule o Maria, ka lepo a me na ilo i ohiia mai na kupapau mai o kahi poe haipule. I mai la o Vala, (he kumu kiekie ia no ka poe pope,) "He umi kausani o ia mau mea liilii ma Roma. A ina paha e haule ka berena mesa, (berena ahaaina) ma ka lepo, e paluia ua berena la me ke alelo, a e kopekopeia ka lepo a e puhiia i ke ahi a lilo i lehu; a o ua lehu la, e waihoia'ku ia iloko o na luakini, he mea hemolele loa no ia." Oia ka Vala. Auhea ka lapuwale i oi i keia?
          Ina imi hou aku oe i ko lakou naaupo, e noonoo oe i ko lakou wai laa, i ka paakai, i ke kuha, i ka aila laa, i na hualei, i ka hahau ana, i na la lawaiia, i na huakai hele, i na hale paa wahine, ke kuhikuhi ana i ke kea, ka bapetema ana i na bele, a me na wahi auau, a me na lio, a me na holoholona e, i ole lakou e maimai a make; pela na mea e he nui loa, aole e pau i ka haiia'ku. Nolaila palapala o Erasemo kela kumu kiekie, ma kana palapala i hooponoia e ka pope, e Leo. X, penei, "O ka malama naaupo i na mea liilii o ka wa kahiko no ka puniwaiwai o na kahuna, a o ka hookamani o na moneka i hanaiia e na kanaka naaupo, oia wale no ka lakou hoomana; aneane loaa ole kahi mea e iloko o ka lakou hana ana."
          2. O ka wahahee. O kela oho i kapaia ko Petero, aole no Pe tero ia. Aole loa i malamaia ke oho o Petero; aole akaka loa kona wahi i make ai. I ka manao o kahi poe naauao, aole ma Roma kona make ana. Pela no na niho o kahi poe haipule a me na iwi o ia lunaolelo aku ia lunaolelo aku a ka poe pope e hoike nei; he mau mea i ohi wale ia no na ilina o keia wa e noho nei kakou; a ua wahaheeia no ka wa kahiko, i puni wale ka poe naauapo; aole e puni ka poe naauao a noonoo. Aole paha i ikeia ka palule o Maria i keia wa e noho nei. Pela ka apana kapa o keia lunaolelo kela lunaolelo. He mau mea kahaha no ka poe naaupo; he mau mea akaaka no ka poe noonoo.

(Aole i pau.)

NA LIMAIKAIKA e hoopuka'ku.