Ka Nonanona, Volume II, Number 7, 30 August 1842 — Page 26

26 KA NONANONA. [AUGATE,

mau mea, he koilipi, he upena, he hinai a me ka aa baka; hoi aku la me kona manao e puka ola i kai, a halawai kino me ka wahine, a me na makamaka. Eha lakou i hoi pu. Hiki koke lakou i kahawai, ua nui loa ka wai. Au mua aku kekahi a hiki ma keia aoao. Noho no keia kanaka mahope, hoa i ke koi ma kekahi lima, a i ka upena ma kekahi lima, au aku pela iloko o ka wai. O kona lilo no ia a make loa. Ma ka la Sabati keia hana. Aloha ino kela kanaka, he naaupo ma ko ke kino a me ko ka uhane. Ua pau pu i ka make. KAAPA.

KUU HOLO ANA I KAUAI.

                I ka la mua o Aug. holo maua me Alekanekero i Kauai, ma ka moku o Kuakini, o Paniku ka inoa. Poakahi makou ma ka moana, a ku ka moku ma Koloa, paina awakea maua me Bainamu, a holo koke kuu hoaaloha i Hanalei, i kona wahi, a holo koke no hoi au ma ka lio i Waimea, e ike ia Mi. Wini ma. Elua hora a me ka hapalua, hiki aku.

Ka pilikia ma Waimea.
                He pilikia maoli malaila. Eia ka pilikia. I ka wa ili ka moku okohola malaila, ua aneane lilo ka aila a me ka waiwai a pau loa i ke kai.
                Nolaila, olelo ka haole ia Puniai e hoolimalima koke me na kanaka he nui, e hana ikaika loa, i ka po a me ke ao, e hoopakele i ua waiwai la. Ae aku la o Puniai, a hana iho la. Haawi aku la ia i uku nui no lakou, he hapalua no ka la, i hoihoi lakou i ka hana. O ka hana iho la no ia a hiki aku o Kealiiahonui, hoole aku ia i ka uku o ka poe hana, aole uku, no ka mea he hana aupuni i kona manao. O ka pilikia no ia. Kaumaha loa ka naau o lakou i ka nele, a ua aneane haunaele maoli. Pehea la e hemo ai keia pilikia?
                Hookahi mea e hemo ai, e uku pono ia na kanaka nana i hana, e like me ka olelo ae like o lakou me Puniai. Ua lilo ka hapaha o ka waiwai a lakou i lawe ai mauka no ke aupuni, e like me ka olelo o kekahi kuikahi, a noloko olaila e uku ia'i na kanaka. Ina i nele lakou i ka uku, hewa loa; a ili kekahi moku hou paha, aole noho a hana iki na kanaka, no ka uku ole ia o kela poe ma Kauai.
                Moe au ma Waimea ia po, a wanaao ae holo hou i Koloa, a ai kakahiaka me Bainamu. Aia ilaila kekahi pilikia.

No ke dala pepa keia pilikia.

                Ua hoole na'lii a me kekahi mau kanaka o Kauai i ke dala pepa. He mau haole kekahi, i hoole i ua dala nei. Lawe kekahi haole i kekahi ope dala pepa, imua o na kanaka e uhai ko ana no Bainamu, a haihai liilii, me ka i ana penei, "ke ike nei oukou, he mea lapuwale loa keia pepa." No keia haunaele, ua haalele kekahi poe i ka hana a na haole ma Koloa. Eia ke kumu o ko lakou hoole ana i ke dala pepa, o ka ike ole i ke dala paa, e haawi aku ai i ke aupuni no ko lakou kino, a me ka emi loa o ka waiwai i loaa mai ma na hale kuai no ke dala pepa. Pela mai lakou ia'u.

O ka inu ko ma Koloa.

                Oia kekahi hewa nui ma kela wahi, a'u i lohe ai. Aole au i lohe i ka inu rama malaila, o ka inu ko a ona na kane a me na wahine, a me kekahi mau haole, oia ka'u mea i lohe. He hana ino loa keia, e piha ai Koloa i ka haumia, a me ka haunaele, a me ka ilihune, a me ka hewa, a me ka make. Auhea oukou e na lunakanawai o Koloa? Ua hiamoe anei oukou? Ua make anei ke kanawai papa i na mea ona? E ke Kiaaina o Kauai, nau no e kinai i kela wai hehena ma Koloa. O kau hana ponoi no ia.
                Ua maikai Koloa i ka nana'ku, he nui wale ke ko e uku ana, ua nahelehele loa no nae kekahi mala ko. Ehia tausani pauna ko paa i hanaia e Bainamu i kela la i keia la. Ua holo loa kana hana. E na haumana kula, ina i loaa mai eha keneta no ka pauna hookahi, ehia dala e loaa mai i kela la i keia la? Ina hoi 300 la hana ko i ka makahiki hookahi, ehia dala e loaa mai i keia makahiki?
                Ia la hookahi no, holo au i Hanalei, a i