Ka Nonanona, Volume II, Number 8, 13 September 1842 — Page 33

KA NONANONA.

"E ka mea hiamoe, e hele oe i ka nonanona, e nana i kona aoaoa a e hoonaauao iho." Solomona.

Buke 2. HONOLULU, OAHU, SEPATEMABA 13, 1842. Pepa 8.

NO KA MOE KOLOHE. Helu 5.

            O ka hewa o ka moe kolohe, ke hoohalike ia me na hewa e ae.

            Ua maopopo, he hewa nui ka moe kolohe; he mea ia e poino ai ke kino o ke kanaka; he mea hoi e make ai ka uhane ma kela ao e hiki mai ana. Aka, ua pale aku kekahi poe i ka makau i keia hewa, no ka mea, kuhi lakou, aole ia he mea ino loa e like me ka pepehi kanaka, aole hoi e like me ka aihue i ko hai waiwai. Ua kuhi hewa loa keia poe. Aole paha e hiki ia kakou ke kaupaona i ka hewa i akaka lea, he kaumaha kela, a he mama keia. Aia no i ke Akua ke kaupaona pololei ana. Aka, i kuu manao, ua oi aku ka hewa o ka moe kolohe, mamua o ka pepehi kanaka, a me ka aihue, a me na hewa e ae a pau loa. E noonoo kakou. I ko'u hele ana i Hawaii paha, i Kauai paha, a hoi mai i ko'u wahi e noho ai, heaha ka mea e kaumaha loa ai ko'u naau o ko'u ike ana anei ua pepehiia a make loa ka'u wahine? aole ia, ua hoohaumia ia oia ma ka moe kolohe. Ua maopopo ia, he hapa wale no ko'u eha a me ke kaumaha ke pepehi ia, he nui loa no ke moe kolohe. Ina i pepehiia oia, ua lana paha ka manao nona. Uwe no wau ma kona, make ana; hauoli no nae me ka manao, o kona pomaikai no ia, aia no ia e noho la me Iesu ma ka lani. Aole pela ka manao ke hoowalewaleia ka'u wahine e ko'u hoalauna a moe kolohe pu me ia. Nui loa ka ehaeha o ka naau. Nui no ka hilahila a me ka huhu, a me ka inaina. Pehea la e hiki ia'u ke hookipa hou i ua wahine nei, ke hoohaumia oia ma keia hewa nui?

            He kaikamahine ka'u. Nui ko'u aloha ia ia, a me kuu makemake i kona noho malie ana, me ka maemae o ka naau, a me ka oluolu a me ka pomaikai. Aka, i ka po i kuu hiamoe ana ua komo malu kekahi kanaka kolohe, hoowalewale mai i keia kaikamahine a'u a moe pu me ia. Pehea wau, ka makuakane? Eha loa kuu naau. Ina ua loaa ia'u ua kaikamahine nei, ua pepehi ia a make loa, e hiki no ke hoomanawanui. E hele au e kanu ia ia me ka manao lana. Aole pela ke moe kolohe oia me ke kanaka. Nolaila, i ko'u manao, ua oi aku ka hewa o ka mea hoowalewale i kekahi e moe kolohe, mamua o ka hewa o ka pepehi kanaka. Aole anei? Pela ka manao o ka poe naauao ma na aina malamalama.

            Elua manao uuku i koe ma ka hooakaka ana i ka hewa o ka moe kolohe Eia ka mua; O ka moe kolohe, he mea ku e loa ia i ka lokomaikai o ke Akua

            Ua ike ke Akua i ke ano o ke kanaka, a i mai oia, i kinohi, "Aole pono ke kanaka ke noho, oia wale; e hana no wau i kokoolua nona e ku ia ia." Pela kana hana mai kinohi mai. I mai paha kekahi poe, "no ke Akua mai ka makemake o ke kane i ka wahine, a o ka wahine i ke kane." Oiaio no, a nolaila, ae mai ke Akua i ka mare ana o ke kane i ka wahine. Menei o Paulo, I. Korineto 7: 2, "Aka, o moe kolohe