Ka Nonanona, Volume II, Number 8, 13 September 1842 — Page 34

34 KA NONANONA. [SEPATEMABA,

auanei, ua pono no i kela kane, i keia kane, kana wahine iho, a ua pono no i kela wahine i keia wahine, kana kane iho." Aole anei he lokomaikai ke Akua i kona haawi ana mai i ka mare? Oiaio no. Aka, o ka poe moe kolohe, ua ku e loa lakou i keia lokomaikai o ke Akua. Haalele ke kane i kana wahine, a moe me ka wahine e, a pela ka wahine. Aloha ino! Manomano keia hewa!

            Eia ka lua; O ka ino maoli o ka mea moe kolohe. Ua like ia me ke aha? Ea! Ua like anei me ka mea i hanaia ma ke ano o ke Akua? Aole anei me ke ano o na holoholona? E nana i ka ilio, a me ke kao, a me ka puaa. Aole o lakou ike i ka mare ana, nolaila, aole o kakou hewa i ko lakou moe wale ana me kela mea keia mea. Aka, o ke kanaka moe kolohe, he mea hilahila loa kana. Ua hoohalike ia ia ia iho me ke kao kane, a o ka wahine moe kolohe, aia no ia malalo o ka ilio wahine!

HE KANAWAI HOOMALU NO KA PA O KE KULANUI.

            Aloha oe e ka Nonanona, hoopuka manao. E pono ia oe ke hai aku i ko L. luna nei kanawai hoomalu no na kanaka owaho.

            I. No ka nui o ka pono ole o na kanaka komo wale maloko o ka pa o na haumana o ke Kulanui o Lahainaluna nei; Nolaila, ua kau ia ke kanawai i keia makahiki, 1842, i ka malama o Iune, 25 la.

            2. Aole pono e komo wale na kanaka o kahi e maloko o ka pa, me ka ae oleia e na kumu; a e ka luna-haneri paha, oia o Kaumaea. Ina he mau malihini paha, a he mau makamaka no kekahi mau haumana, a me na makua pono e hele e lakou a e noi aku i na kumu oonei; a ina i hilahila paha lakou no ke noi ana, e hiki no i ka lakou mau keiki iloko o ke Kula ke noi aku, a loaa mai, alaila komo. Ina ua hele na kumu, aole mea hiki ke noi aku, alaila, na Kaumaea no e ae.

            3. Eia wale no ka poe pono ke komo wale ; o kamaaina i noho mua no maloko o kela pa, a me na ohua o na kumu. O lakou wale iho no. Na kumu o ke Kulanui.

Na'u na HALEOLA, i kakau iho.

NO KE KUHIHEWA.

            Eia kekahi manao kuhihewa, mai ka wa kahiko, a hiki mai i keia wa e noho nei kakou, he kuhihewa maoli no.

            Penei ka olelo pinepine ana o na kanaka, he mea make ka hekili, aole make ka uila. I ka wa e kani ai ka hekili, makau na kanaka, manao lakou o kela leo, oia ka mea e make ai ke kanaka. Pela ka olelo ana ma K. Hawaii no ka make ana o kekahi keiki ma Mana i Kauai. Manao na kanaka, o kona make ana, ua make oia i ka hekili. Pono ke alia iki i ka make o ka hekili.

            Eia ka mea akaka, o ka hekili, he leo wale no ia no ka uila, i ka wa e lele ai ka uila ma kela wahi, keia wahi, ia manawa no, ua lohe kakou i ka lea o ka uila, oia ka mea a kakou i kapa aku ai he hekili. O ka uila, ua like ia me na kaa nui he lehulehu e holo wikiwiki ana ma ka honua, na lohe ia ko lakou halulu ana, pela no ka uila e holo wikiwiki ana ma ka lewa.

            Nolaila, aole pono ke alelo o ka hekili ka mea make.

            Eia kekahi mea akaka. I ka wa e kani ai ka pu, aole e make ke kanaka ma ke kani ana, aka, ina lele