Ka Nonanona, Volume II, Number 8, 13 September 1842 — Page 36

36 K A N O N A N O N A. [SEPATEMABA,

Holo aku ka manuwa i ka la 8, o Sep. nei.

            E na kanaka o Hawaii nei, aole anei keia he aniani e akaka'i ke ano o ka ekalesia Roma? Kainoa ma ka mana o ka olelo a me ka Uhane e lanakila ai ka ekalesia o Kristo, a e piha ai ka honua i ka pono a me ka malu. Aole nae pela ka ekalesia Roma; ma na pu a me na koa a me ka pualikaua kekahi mana ona e lanakila ai. Aole anei maopopo malaila, o Anekristo ka aoao o ka pope?

            Eia kekahi mea a'u i lohe ai; i ka wa i ku ana keia moku kaua maanei, i kekahi la, ua lawe nui ia na haumana pope maluna iho ona. Ua lawe pu ia na kane, na wahine a me na kamalii; ekolu waapa o ka manuwa i piha, a ua kahikoia lakou i na maile a me na lei a me na lau o ka nahelehele, i hanohano lakou. A i kuu lohe, ua kokuaia lakou e na manuwa i kahi lole, a me kela waiwai, keia waiwai.

            Heaha ke ano o keia hana? Eia no, e kokua i ka aoao o ka pope, e hoohoihoi i na naau o na haumana pope, a e malimali i na kanaka o Hawaii nei e huli malaila. Aka, ea, he ninau kou ia oe, e ka mea heluhelu, o ka hana anei keia i ku pono i na manuwa ke holo mai maanei, e kokua i kela aoao a i keia aoao haipule? Kainoa ma na mea o keia ao ka hana a na moku kaua; aole ma ko ku uhane. Eia ka! ua holo mai kekahi manuwa e kokua i ka ka pope oihana ma na mea o ka uhane. Oia kaua hana nui a'u i lohe ai. Nolaila ke nana nei ai i ke ano o keia hana, a ke manao nei hoi au, ua like ka aoao pope me na aupuni o keia ao, aole like me ko Kristo aupuni. I mai oia, "aole no keia ao kou aupuni?"

HE KULA HAOLE MA LAHAINA.

            No Iakobo M. Sile keia kula. Ma ka olelo Beritania wale no lakou e kula nei, a ua olelo ia ua holo mua na haumana. He 30 haumana iloko o keia kula; 22 keiki Hawaii, a 8 keiki hapa haole.

            Ua hoole okoa keia kula i na mea ona, a ua lilo i "Puali inuwai."

            Eia ilalo na kanawai a lakou i hoohiki ai.

            1. Eia ka mua: --Aole loa makou e inu iki i ka rama, i ke gini, i ka waina, aole hoi i kekahi mea e ae e ona ai.

            2. Eia ka lua:—Aole loa makou e puhi baka, aole hoi e nau i ka baka, no ka mea, he mea awahia no hoi ia, e alakai ana i na mea ona a pau loa.

            3. eia ke kolu:—Ke olioli nui nei ko makou mau manao opiopio, no ka mea, ua haalele ke 'lii nui, me na'lii a pau, a me kekahi poe haole, a me na kanaka maoli kekahi, i na mea ona, a ke makemake nei no hoi makou e hele pu ma ia ala nui maemae loa, i ola ai ko makou mau uhane ia Iesu Kristo.

            4. Eia ka ha:—Ina paha e hana kue kekahi haumana i keia olelo hoohiki, e hookolokoloia oia, a akaka kona hewa, alaila e holoiia kona inoa me ka minamina, aka, i mihi oia, e pono no ke kakau hou i kona inoa; aka hoi, ina hana hou pela, e paiia auanei kona inoa maloko o ka Nonanona."

MAKE EMO OLE.

            l ka la 6 o Sep. nei make emo ole o Kalaniwahineamoku ma Maemae, kokoke i Honolulu nei. He kumu ao kula ia, no ke Kulanui ma Lahainaluna: he hoahanau no hoi. Aole ikea kona hihia. Ua ikaika no ia ma kana hana, a ua makaukau kana poe haumana. O ka luai a me ka hi kona mai, a make koke iho. Aole anei he mea keia e paipai ana ia kakou e hana koke i ka kakou hana me ka maemae, i makaukau kakou no ka hiki ana mai o ke Kanemare?

KAIKAMAHINE MAKE OLUOLU.

            Ua make ke Kaikamahine o Davida, Papohaku ma Waioli, o Loita kona inoa. I ka la 13 o Iulai kona make ana. O ka naha koko ka mai. Eiwa kona mau makahiki.

            He ano maikai kona; aole ia i hele pu me na keiki kolohe; ua hoolohe i ka leo o kona mau makua. Makemake ia i ka pule ohana a me ka pule mehameha, a ua makau i ka hewa. Nolaila ua oluolu kona make ana

            Ua eha loa ka naau o kona mau makua, aole nae manao ino. Olelo laua he mau puuku laua no ke Akua, e malama i keia waiwai ana i lawe aku ai, a ua pono kona kii ana mai.