Ka Nonanona, Volume II, Number 8, 13 September 1842 — Page 37

1842. KA NONANONA. 37

MAKAI NUI.

                Ua hoonoho o M. Kekuanaoa ia F. W. Thompson i Makai nui, e hooko ai i na kanawai ma kekahi mau mea e pili ana i na haole, a ua nui ka ikaika i haawiia ma kona mau lima. E hiki ia ia ke olelo aku i na makai a pau, a me na haole a pau e kokua ia ia ke pilikia.

KE KIAKOLU MERELANI.

                I keia mau la iho nei, ku mai ia mai Mekiko mai, a kokoke holo hou aku ilaila: elua pule koe paha, a holo aku. Ua laweia mai kekahi mau palapala mai Am. Huipuia mai, ole nae he mea hou i lohea.

                E na hoahanau mai Hawaii a Kauai.
                Ua paa ka buke Moo-Olelo Ekalesia, aia i Lahainaluna. O ka mea makemake ia buke, e palapala koke aku ia Aneru. Ke makemake nei au e ike i ka makemake o kakou i buke hou i mahuahua ia'i.
Na'u na GREEN.

HE WAHI NINAUHOIKE NO KA AOAO POPE.
(E nana i ka aoao 31.)

                Huna lakou i ka palapala hemolele, ke kanawai o ke Akua, ka mea i lilo i "kukui no ka wawae," a i "malamalama hoi no ke alanui," o ka poe pono a pau loa. I ka lakou ao ana, aole pono e manao i ka mea i ike maka ia he oiaio, e like me ka berena mesa; aole pono e manao i ka mea i loaa ma ka noonoo pono, he oiaio ia; aole pono e manaoio i ka ka palapala hemolele; ma ka ke kahuna e manaoio ai.
                E like me ko lakou manaoio, pela ka lakou hoomana ana. Ua hunaia ia lakou ke ano o ka lakou pule. Aole noonoo lakou i ka hope o ka lakou hana ana; a ua hookoia maluna o lakou ia olelo, Mat. 15: 14. "Ina he makapo e alakai i ka makapo e haule pu laua iloko o ka lua."
                8. He aoao hoino i ke Akua ka aoao pope.
                Ua kapa aku ka poe pope ia Maria ma na inoa hemolele o ke Akua a me Iesu. Ua haawi lakou ia ia ka mana a me na oihana a ke Akua. Pela ka haawi ana i kahi mau mea e i hanaia e ke Akua, pela i kekahi poe o na pope; he poe hewa ino loa nae ua mau pope nei, aole hiki i na haumana a lakou ke hoole, no ka mea, he kaulana ko lakou hewa. Like loa lakou me ka diabolo i ka hana ino. O ka hoohalike ana i na kanaka a me kahi poe ino me Iehova, oia ka hoino ia Iehova.
                I ka wa i pepehi ai o Poca i kona alii, ia Maurike, ma Konesetanito i ka makahiki 606, make pu ia ia ke alii, a me kana wahine, a me kana mau keiki a pau; aole pakele ke keiki uuku ai waiu. Kupanaha ka ino oia hana ana, a ua hoohewaia hoi e na kanaka a pau loa. Aka, o Geregore, oia ka pope ia manawa, mahalo loa aku oia ia Poca, no ia pepehi kanaka ana. Penei kahi olelo iloko o kona palapala ia Poca.—"E hoonaniia ke Akua ma na lani kiekie loa; e hoike na lani i ko lakou olioli, e lele ka honua i ka olioli, a pono na kanaka a pau o ka honua e hauoli no kau hana ana." Auhea ka olelo e like me neia i ka hoino i ke kanawai pololei o ke Akua?
                O ka poe Iesuito, he poe pope lakou, ua ao aku lakou penei, "Hiki ia Iesu ke hana hewa; hiki ia ia ke haule iloko o na hana ino e like me kanaka; hiki ia ia ke kuhihewa a hana lapuwale. I ko Iesu lilo ana i kanaka, e hiki no ia ia ke hai mai i ka wahahee, e like me ka hiki o ka eha a me ka make ia ia." Pela mai Amico, a me Naseke, a me na mea e he nui loa.

(Aole i pau.)