Ka Nonanona, Volume II, Number 8, 13 September 1842 — Page 38

38 KA NONANONA. SEPATEMABA,

KE KUMU POPE MA NIIHAU.

Kaununui, Niihau, Iulai 28, 1842.
                Aloha oe e ka Nonanona.—Eia ka lua o keia palapala ana'ku ia oe. He palapala ninau keia, a hiki ole ia oe ke hoomaopopo mai, e ninau aku oe i na'lii i ka poe nona ka aina o Hawaii nei, a na lakou e hai mai ia'u. He pono anei i na kumu pope e hookolokolo i na luna kanawai o keia aina? I hiki anei ia lakou ke wehe i na halepaahao a hookuu aku i ka poe e hoopaiia'na? E hai mai oe, no ka mea, he lunakanawai au no Niihau nei, a i keia mau la pae mai nei kekahi haole, he kumu pope. A hoopii kekahi mau haumana ana, kii koke iho la oia ia'u e hookoloko. Elua kii ana o ka luna ia'u. Elua o ko'u hoole ana'ku ia ia. I aku la au; aole au e hele aku, he malihini ia he haole, aole au ike o kana hana keia. Ma ka leo o ka luna nana i kii mai ia'u, aole au i lohe he hookolokolo, a pela no ma ka palapala a ka haole, aole i puka mai ka luna e hookolokolo; aka ma ke ano o kana hana ike no au, a pela no i kuu lohe i na haumana ana he hookolokolo ana mai ia'u, no kuu hoopai ana i ka poe hewa io, a no kuu palapala ana'ku ia oe i ka hewa o Kahuaunioluolu i kona hoopunipuni i na'lii.
                Eia kekahi, ua kii mai lakou a wehe i kekahi wahine paahao, a lawe aku mai ko'u alo aku. O Hueia ka inoa o ua paahao la. Ina he pono keia hana a ka poe kumu pope e olelo mai oe ia'u, no ka mea, aole au i lohe he mea keia e hiki ai i na haole a i na malihini e hookolokolo i na lunakanawai o keia aina, a e wehe hoi i na paahao. Ina he pono keia hana a lakou, e hai mai oe, no ka mea, eia ko'u e waiho aku au i ko'u lunakanawai ana, aka i pono ole ka lakou, aia no i na'lii ka ike mai, a e kokua mai hoi. Eia ka palapala a ua haole la, e pai oe e hoolohe aku ka poe a pau e heluhelu ana i na mea hou au i hoolaha ai.
Na ABELA KAHIKIAE.

Apopo, Iulai 27, 1842.
                Aloha oe e Kahikiae.—Ua lohe au i kekahi wahine ua hoahewa aku oe ia ia, o Hueia ka inoa o ua wahine la. Ua hoopiiia'i oia imua ou no ka moe kolohe. Olelo mai o Hueia, i i mai oe aole ona hewa malaila, aka, ua imi oe i mea hewa hou e hoopili ia ia. Ua hoopii oe ia ia no kona huna ana i ka hewa o kekahi poe, aka, aole i ike maka oia i ko laua hewa. No keia mea, i hoike mai o Hueia ia'u, ua hoahewa oe ia ia i ka hana, elua mau makahiki nae e pono ia ia ke hana e like me kou manao. Aka, ina he oiaio ka olelo ana a Hueia ia'u, aole hewa iki oia, nolaila ke nonoi aku nei au ia oe e hoakaka mai ia'u i kona hewa: ina aole ona hewa, e pono ia oe e hookuu koke aku ia ia. Ua hoike mai Petero Kookoo, i olelo mai oe, ua hele mai au he malihini nae—he hookiekie ko'u. Heaha ka'u mea i hookiekie ai? e hoakaka mai oe. Aloha maikai oe. ALEKENIO,
Kahuna Katolika.

Auhea oe e Abela Kahikiae,
                He mea uuku ka Nonanona, he mea ikaika nae, a eia kona manao ia oe. He manao hoole i ka Alekenio i hana mai i kou wahi. Aole o kpna hana ia. Aole pela ma Farani, aole pela ma Irelani kahi i hanau ai ua kumu pope la, aole i na aina a pau, aole e hiki ia lakou e kuu aku i na paahao, aole ia lakou ka hookolokolo i na lunakanawai.