Ka Nonanona, Volume II, Number 10, 11 October 1842 — Page 46

46 KA NONANONA. [OKATOBA,

o ka ekalesia o Roma, oia wale no ka ekalesia oiaio.
                I. Pehea ka poe hoole pope i keia?
                D. Hoole loa lakou.
                I. No keaha?
                D. Eia ka lakou i hoole ai ia manao; ua hoakaka mai ke Akua i ke ano o ka ekalesia oiaio. Aole loa i kupono ka ekalesia o Roma i ke ano o ia ekalesia oiaio.
                I. Owai ka ekalesia oiaio?
                D. O ka poe a pau ma ka honua i waeia e ke Akua, a malama pono i kana. Ua hoohanau hou ia e ka Uhane Hemolele, a "Ua kukuluia hoi laou maluna o ke kahua a na luna olelo a me na kaula, o Iesu Kristo iho no ka pohaku kumu o ke kihi." Epeso 2: 20. Oia ka ekalesia oiaio.
                I. Heaha na hoailona e akaka ai ka ekalesia oiaio?
                D. Penei kahi mau hoailona; o ke ao ana'ku i na mea maemae a pololei e like me ka palapala hemolele; o ka manaoio a me ka malama ia mau mea pololei; o ka noho haipule io; o ka malama i na oihana pule a pau, a me ka hooponopono ekalesia e like me ko Kristo manao. "Hahai mai na hipa ia ia, no ka mea, ua hoomaopopo lakou i kona leo." Ioane 10: 4. "I hoolaa mai ai oia i ka ekalesia, me ka hoomaemae iho i ka wai auau, a me ka olelo." Epeso 5: 26. (Aole e pau.)

KA WAIWAI O KA HELU.

                Eia ko'u manao, e hoike aku ia oukou, no ka helu. Ninau mai paha kekahi ia'u; penei. Heaha ka waiwai o ka helu? Eia no, ke hoakaka aku nei au. O ka ike i ka helu, oia kekahi mea e makaukau ai ke kanaka i ka noonoo, a me ka wehewehe i na mea paakiki. Akahi pono.
                O ka ike i ka helu ka mea e makaukau ai ke kanaka e kuai; no ka mea, ua hiki no ia ia ke helu i ke kuai ana o ke dala, i me e akaka ai ka loaa mai, a me ka poho.
                Aole hiki keia mea i ka mea ike ole i ka helu. Ua waiwai na haole e noho nei ma ke kuai; no ko lakou akamai i ka helu. O na kanaka o Hawaii nei, he noho ilihune; no ka ike ole i ke kuai. Alua pono o ka helu.
                Eia ke kolu. O ka helu ka mea e makaukau ai e hana i ka oihana lunaauhau, a i ka oihana lunakanawai, a me ke kiaaina. Aole pono keia mau hana i ka mea ike ole i ka helu. Pela ke kanawai hou i kau iho nei. Pehea keia mau hana i ka mea ike ole i ka helu? Ina i noonoo ke kanaka, ma ka helu e ike ai. Ina i noonoo ia i na dala, a me na aie, a me ka wehewehe ana i na mea pilikia a pau ma ka waiwai, e hiki no ma ka helu. Nolaila; ua akaka, he mea waiwai nui ka helu.
                Eia ka pono eha. He poe wanana ka poe ike i ka helu. Wanana e lakou i ka pouli ana o ka la, a me ka mahina.
                Wanana e lakou i ke kai nui a me ke kai make; wanana e mai hoi lakou ma ka helu ana, he 25 makahiki i koe, a pau ka pope i ka hookahuliia. A hiki mai ia la, e nana kakou i ka waiwai o ka helu.
                Eia hoi ka lima. O ka poe ike i ka helu, oia wale no ka poe ike i ka hooholomoku, a me ke Anaaina, ana hoku, ana pahu, a me ka lole. Aole pono keia mau hana nui i ka poe ike ole i ka helu. Pehea ka moku ma ka moana? Lilo anei i ke kapena ike ole i ka helu? aole lilo ia ia, ke ike ole i ka helu latitu, a me ka lonitu,