Ka Nonanona, Volume II, Number 11, 25 October 1842 — Page 52

52 KA NONANONA. [OKATOBA,

Kane. Wahine. Keiki.

O Kalaninuieiwakamoku, O Kalola, O Kiwalao.
O Kiwalao, O Kekuiapowa, O Kalanikauikaalaneo.
O Kalanikupuapaikalani, O Kekuiapoiwa, O Kamehameha.
 Kepoookalani.
O KAMEHAMEHA I, O Kalanikauikaalaneo, Liholiho.
 Kauikeaouli.
 Nahienaena.

          O keia kuauhau alii, oia na kupuna o na'lii a me na kanaka o Hawaii nei. Ua hoomanamanaia'ku ma kela wahi ma keia wahi o Hawaii nei. Ua okoa na'lii, ua okoa na kanaka. Ua hele na'lii ma ko lakou aoao kiekie, ua hele na kanaka ma ko lakou aoao haahaa.
          O na'lii Oahu a me Kauai, o ko Hawaii a me Maui a me Molokai hookahi no kupuna. Aka, ua hoomanamanaia'ku, a ua hui hou aku no nae ma ke kauwahi.
          Ma ke kuamoo kuauhau o Nanaulu, ua manaoia, oia kekahi kupuna o ko Kahiki a me Polapola, no ka mea, ma ia kuauhau mai a hiki mai ia Moikeha (ua olelo ia oia, mai kahiki mai) a noho ia Hooipo (o Hinauulua) i Kauai, a hanau mai ka laua mau keiki ekolu: o Hookamalii, o Haulanuiaiakea, a me Kila. A ua lilo o Hookamalii i kupuna alii no Oahu, o Haulanuiaiakea no Kauai, a o Kila no Hawaii.
          Ma ka mookuauhau o Punaimua, oia kekahi kupuna o ko Oahu a me ko Kauai, a me ko Hawaii mau alii. Mai a Punaimua, a hiki mai ia Laamaikahiki; (ua oleloia oia, mai kahiki mai) a ma Kualoa i Oahu kahi i pae ai; a noho i na wahine eha, o Hoakanuikapuaihelu ka inoa wahine, o Waolena kekahi, o Manoopupaipai kekahi, o Halaula ka ha. Ekolu wahine i hanau i ka la hookahi. O Hoakanuikapuaihelu, hanau o Laulialoa; o Waolena, hanau o Ahukinialaa, o Manoopupaipai hanau o Kukonalaa; o Halaula, hanau mai kana o Laapuweluula, he manawa okoa kona i hanau. Maanei mai i loaa mai ai kekahi mau kupuna alii o Oahu a me ko Kauai a me ko Hawaii a me Maui.
          Ma kahi i hui ai ko Kauai alii me ko Hawaii, o Kalanikukuma noho ia Kapoleiakauila o Kahakumakaliua, o Umi noho ia Mokuahualeiakea; o Akahiilikapu, hanau o Koihalawai; noho ia Keawenuiaumi o Kanaloakuaana.
            O kahi hoi i hui ai ko Oahu poe alii me ko Hawaii, o Kaihikapuakuihewa noho ia Ipuwaiahoalani; o Kauakahikuanauakana; o Makakaualii noho ia Kapukamola; o Iwikauikaua noho ia Kauakahikuaanuakana; o Kaneikauaiwilani noho ia Keakealani, o Kalanikauleleiaiwi.
          Nolaila, ua hui na'lii i hala aku nei, a o na'lli kahiko loa ua hui lakou; nolaila, ua hele aku na'lii o kela aina o keia aina e makaikai a e hana lealea; no ka mea, ua olelo pinepine ia ma na kaao; aka, he nui na mea e ino ai lakou o ke kaua aku, o ke kaua mai.
          O na mookuauhau i hoomanamanaia o Nanaulu; o Nana, Kapulani, o Punaimua, o Kuhelani, o Hanalaaiki, o Kanaloa, o Kalahumoku, o Makalae a me Hakau, a me na mea e ae. Hookahi wale no mea nona ia mau kupuna i keia manawa.
          O na kanaka o keia mookuauhau, mai mua mai a hope, o na mea i hoomanamanaia'ku ma na keiki, aole ia no keia kuauhau hoomaopopo wale ia no kela mana keia mana i maopopo. Na S. M. KAMAKAU.