Ka Nonanona, Volume II, Number 12, 8 November 1842 — Page 58

58 KA NONANONA. [NOVEMABA,

a o kana wahine kekahi, hanai enuhe no ia a me kekahi mau aliiwahine e ae. Laha koke iho la ka hana silika iwaena o kela aupuni nui. Ma ia hope mai ua lilo ke silika i waiwai nui no Kina.
                Laha ae keia hana, mai Kina ae a ia Peresia a me Hinedu. A i ka wa i kaua ai o Alekanedero ka Nui me Peresia a me Hinedu i laha hou ai ka hana silika i ka aina o Helene: 350 makahiki keia mamua aku o Kristo.
                I ka makahiki o ka Haku 1146 kaua aku la o Rogero ke alii o Sikili me ko Helene, a lawe pio mai la i kekahi poe akamai i ka hana silika. Mai laila i laha mai ka hana silika ia Italia a ia Farani. Kokua nui mai o Heneri IV, ke alii o Farani i keia hana; a o na'lii malalo iho ona kekahi, hooikaika nui lakou me ko lakou alii.
                No keia kokua ana mai, ulu koke ka hana silika malaila: ulu lanakila no a hiki loa i keia manawa: a ua waiwai ke aupuni o Farani i ke silika.
                I ka makahiki 1835 ua heluia na dala o ke silika i hanaia ma Farani. i ka makahiki hookahi, a ua nui loa no, he iwakaluakumamaono miliona dala! I keia manawa, ua nui aku paha i kela makahiki i keia makahiki.
                Auhea oukou, e na'lii a me na kalaiaina o Hawaii nei?; E noonoo oukou i keia hana. No ke uha la e waiwai ole ai keia pae aina i ke silika? E kokua maikai oukou i keia hana a e imi i ka mea e laha nui ai ia iwaena o keia lahuikanaka, i waiwai ke aupuni.

HE MELE NO LAHAINALUNA.

He kanikau ia oe, e Lahainaluna, a me ko aloha i ka manawa, a me ka hoi ana o na haumana.

(Aole o pau i ka paha keia mele, no ka nui loa.)

Aloha oe e Lahainaluna ka pua rose o keia pae aina.
He mea ala oe i honi ia ma kela wahi keia wahi.
Ua like kou ala me ka mura a ka aloe, me ke sinamona,
Aloha oe Lahainaluna ke kahiko o keia pae aina.
Ka pua rose, i pua mai i ke kakahiaka, o mohala ae la.
Aloha kou mau pa, a me kou mau hale hanai hipa.
Aloha oe; e Lahainaluna,
Ua hookomo mai oe i na hipa' opiopio iloko o kou pa.
He mea ia e nani ai nou a e hanohano ai.
Ua omo lakou i kou waiu e Iike me ka makuahine hanau keiki.
Aloha kou mau hale kiai, a me kou mau keena hoano e L. luna,
He milimili oe na ko Amerika poe manawalea."
Aloha kou wa imi naauao, a me ke akamai, a me ka pono.
Aloha ka manawa heluhelu paanaau; i ka olelo a ke Akua a me na moolelo hemolele,
Aloha ka manawa imi helu kakau, helu naau, a me na pepa hoike naauao a pau,
Aloha ka manawa kula, e lohe ana i ka leo o ke kumu me ke ao mai.
Aloha ka manawa uhai aholo: o na kiko!
Aloha ka manawa kukakuka o ka naauao, a me ka pono.
Aloha ka manawa kani o ka bele, pau ka lohe ana i kou leo!
Aloha ka manawa hooikaika mai o na kumu, e imi i ka naau hou, a me ka pono a me ka mihi,
Aloha na manawa halawai i ke kakahiaka, a me ke ahiahi.
Aloha ka la Sabati o ke Akua, he la hoomakaukau ai no ka uhane,
Pau ka lohe ana i ka leo o ka Haku, a me kona kahea ana mai!
Aloha ka manawa heimene, a me ka hoonani aku i ka Haku ia Iesu,
Pau ka lonolonowa ana, aole kuka pu,
Aloha ka piina lole o Kuli lole, a me ka iho na lole o Paupau,
Aloha ka manawa kamakamailio me na kumu.
Aloha ka wa hanalima o ua haumana o ke Kulanui nei,