Ka Nonanona, Volume II, Number 12, 8 November 1842 — Page 60

60 KA NONANONA. [NOVEMABA,

me na kiaaina, a me na'lii a pau o kieia aina pomaikai, ma keia la maikai.
                Ke manao nei au o na hae e ku ana a puni nei, me he anuenue la e lana ai, a e olioli ai ka manao, a o ka hoailona e kau ana ma ko oukou poo, he hoku hou ia maluna o Hawaii nei: e like me ka wai aiai a me ka huihui e kahe nui ana mailoko mai o na mauna paa mau loa, pela no e ku paa i ko oukou hoohiki ana.
                Aia pau ka oukou hana kinai rama ma keia ao, e inu oukou i ka muliwai aiai e like me ke aniani, e puka mai ana mai ka nohoalii mai o ke Akua a o ke Keikihipa."
                Pau keia, ku iluna kekahi mau kanaka elua, o Kauka naauao laua o Kapena kinai rama, a kamakamailio me ka leo nui. Penei ka laua kamakamailio ana.
                K. N. Aloha oe, e Kapena Kinai Rama.
                K. R. Aloha hoi, e Kauka Naauao. Pomaikai no kaua no ka halawai pu ana i keia la.
                K. N. Ae, pomaikai io, no ka mea, makemake no au e kamailio pu kaua no ke kinai Rama.
                K. R. Owau hoi kekahi, no ka mea aole launa pono mai kekahi poe ia'u, no ka mea, ua paa ko'u manao e hookapu i na mea ona a pau. Ua hewa paha wau, aole paha; o oe paha ka mea i ike.
                K. N. Eia ko'u mea i ike ai; he nui loa ka poe i make i ka ona.
                K. R. Ae, pela ko'u manao. Nolaila, ua ikaika ko'u, e hoopau i na mea ona a pau loa. Aka, ea! i lohe pono na Lii, a me na kanaka a pau loa; e hoike maopopo mai i na hua ino o ka Rama.
                K. N. He nui loa na mea ino no ka Rama. He kumu ia no ka huhu, a me ka hakaka, a me ka pepehi kanaka.
                K. R. Heaha hoi kekahi?
                K. N. He mea ia e ilihune ai ke kanaka. Nui loa ka waiwai i poho wale no ka Rama. Nolaila, ua pololi na makua a me na keiki, a ilikole no hoi.
                K. R. Pehea ka Rama? He mea anei ia e pono ai ke kanaka ke inu aku, e like me ka wai maoli?
                K. N. Aole loa! No ka mea, o ka wai maoli, he mea ia e hooluolu i ke kino a me ka manao; aka, o ka Rama, he mea ia e huhu ai ke kanaka, a e hoohiki ino, a e hailiili, a e lalau i o, ia nei, e like me ka mea hehena.
                K. N. Pehea ka poe ona rama, ke loaa ia lakou ka mai? E kokua pono anei ka laau lapaau ia lakou?
                K. N. Aole. Kakaikahi o ka poe ona rama i pakele i ka make, ke loaa ia lakou ka mai. 30,000 o ka poe ona ma Amerika Huipuia, ua pau i ka make, i kela makahiki i keia makahiki.
                K. R. Heaha ka mea e pono ai ka poe ona?
                K. N. Eia ka mea e pono ai ka poe ona. E haalele mau lakou i na mea ona a pau.
                K. R. Ea! O oe no ka mea i ike pono i ko ke kino—oia hoi, o na iwi, na olona, na aa, ke koko, ka io, ka ili, ke poo, ka wawae, a me ko ke kino a pau. Nolaila, heaha ke kumu o na huhu, a me ka hehena, o ka poe inu rama? K. N. Eia. Inu no ke kanaka i ka rama, e omo koke no ia e na aa, a hui pu me ke koko, alaila ua wela ke koko, a lapalapa mai la, a holo wikiwiki ke koko i o, ia nei, nolaila ua puka mai ka enemi, a me ka pepehi kanaka. K. R. No ke aha ka poniuniu, a me ka ona maoli?
                K. N. No ka mea, ua omo mai kekahi aa i keia wai wela, alaila ua kahe ia i ke poo, a komo iloko o ka lolo, alaila ua hoohaunaeleia ke poo, a ua hiki koke mai ka poniuniu, a me ka hehena, a me ka ulala, nolaila, ua hana ke kanaka e like me ka daimonio.
                K. R. Aia la! Ea! Auhea oukou, e na koa o ka Puali Inuwai? Ua lohe pono anei oukou i keia manao o Kauka Naauao?
                Poe Koa. Ae, ua lohe makou.
                K. R. Pehea? Makemake anei oukou e inu hou i ka Rama?
                Poe Koa. Aole.
                K. R. e ku paa anei oukou ma ka Puali Inuwai?
                Poe Koa. Ae, e ku paa no.
                K. R. Pela oukou a pau loa?
                Poe Koa. Ae.
                K. N. Oia anei ka poe koa e kinai ana i ka rama ma Kaumakapili nei?
                K. R. Ae, ua ae like no makou i ka Puali Inuwai.