Ka Nonanona, Volume II, Number 12, 8 November 1842 — NO KE KUAUHAU. [ARTICLE]

NO KE KUAUHAU.

I ka wa kahiko he olelo kapu loa keia, aohe e haawi ia aku i ke kanaka e, i kana keiki no e haawi ai. Aole e loaa keia olelo i ka makaainana; aole i na kanaka kuaaina; aia o na lii ka mea e loaa ai. E ni-

nau aku i kanaka o ke kuaaina, aohe e loaa; ina ua loaa i ke kanaka he kanaka alii no ia; no ka ike i ke kuauhau nae ia. Na kanaka i hanau alii, no ke lii; aole na kanaka kuaaina e noho ana me ke lii nui; o ke aikane a me keiki hookama ko ke kuaaina mau kanaka noho me ke lii nui. He ninau ia nae ko laua; o ka ike i ke kuauhau ka mea e hemo ai ka pilikia o na mea e hakaka ana, i ka i ana mai a ka mea i ike "o kou kaikuaana no keia, na mea oe, na mea keia," a ike laua, pau ae la ka pilikia. O ke kuauhau oia ka mea i ola ai o Peleioholani ia Alapai i na Onealaa. Ma ka ike i na hanau ana e komo mai ai ke aloha i kekahi i kekahi. O ka ike i ke kuauhau, oia ka mea i ola ai o Kalaniopuu ia Kahekili ia Kamokuilima. O ke kuauhau, oia ka mea i ola ai o Kaumualii ia Kamehameha i Mamala. O ke kuauhau, oia ka mea nana e hookaawale i ka pilikia o keia mau aina mai Hawaii a Kauai i ka wa kahiko. O ke kuauhau, oia ka puuhonua o keia mau aina ia wa. O ke kuauhau, he mea makemake nui ia e na 'lii, o ka wa kahiko. Pela mai ka lohe. Auhea oe e Kamakau kuauhau nui o Lahainaluna, ke ninau aku nei au ia oe ma kau palapala kuauhau i hookaulana mai ai oe i kou makaukau i ke kuauhau. Aia ma ka aoao 52 o ka Nonanona kuu ninau ia oe, o Kamehameha o Kepookalani o Liholiho o Kauikeaouli, o Nahienaena i kau la oe ia Kepookalani malalo iho o Kamehameha ma luna ae o Liholiho i ke

aha? I keiki anei na Kamehameha? I kaikuaana no Liholiho anei? O Kepookalani hea la keia? O Kepookalani makuakane anei o Aikanaka? Ina oia, ea, e hoole aku au ia oe; aole o Kepookalani na Kamehameha, na Kameeiamoku ia keiki, i noho ia Kamakehikuli hanau o Kepookalani. O ko'u nana ana i keia hanauna kuauhau, aohe pono me he apo wale la. Mai hana i ke kuauhau me ka lohe ole. Na A. UNAUNA.