Ka Nonanona, Volume II, Number 14, 6 December 1842 — Page 69
KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona
Buke 2. HONOLULU, OAHU, DEKEMABA 6, 1842. Pepa 14
HE WAHI NINAUHOIKE
no ka aoao pope.
(E nana i ka aoao 66.)
I. Heaha ka umikumamaha o ke kuhihewa o ka poe pope?
D. O ko lakou manao ana, e hiki i ka poe haipule ke hana i ka pono i oi aku mamua o ke kanawai o ke Akua.
I. Pehea ka manao o ka poe pope ma keia mea?
D. Eia ko lakou manao; E hiki i ka poe haipule ke malama i ke kanawai a pau o ke Akua, a me ka hana hou aku i kekahi mau hana pono oi mamua o ke kanawai o ke Akua, oia kekahi mau hana paha i olelo ole ia ma ke kanawai o ke Akua; a ua hana io no pela kekahi poe haipule. A o ia mau hana pakela a lakou, ua lilo i waiwai nui a hoahuia maloko o ko lakou ekalesia; he mea ia e kokua aku i kahi poe hewa, i pau ko lakou hewa. Aia i ka pope ia waiwai; nana no e haawi aku i kana mea e makemake ai. Nolaila, e hiki i ka pope ke haawi aku i kekahi pono pakela o Paulo paha, o Toma a Bekete paha, i mea e hookaa aku ai i ka hewa o kahi poe moe kolohe i keia wa e noho nei.
I. Pehea ka poe hoole pope i keia?
D. Eia ka lakou; o ka poe pono loa, aole hemolele loa lakou e like me ke kanawai o ke Akua; nolaila, aole loa e hiki ia lakou ka hana oi mamua o ka olelo hemolele a ke Akua. Aole hiki ia lakou ke haawi aku i kekahi aila ia hai. "Olelo ae la ka poe naauao, i ae la. Aole paha e lawa ka aila no kakou a pau;" Mat. 25: 9. Aole kakou i lohe ma ka palapala hemolele, e ili aku ka pono o kahi kanaka ia hai. "O ko lakou mau uhane iho ka lakou e hoopakele ai ma ko lakou pono." Ezekiela 14: 20.
I. Heaha ka mea pono no keia kanaka kela kanaka?
D. Eia, o ka malama i ke kanawai a pau o ke Akua, ma ka manao, ma ka olelo, a ma ka hana.
I. Aole anei keia o ka noho malalo o ka lokomaikai?
D. O ke kanawai o ke Akua, he alakai ia no ka poe manaoio ma ka pono; aole ia he berita e ola'i lakou. "Mai manao oukou i hele mai nei au e hoole i ke kanawai a me ka poe kaula. O ka hooiaio ka'u i hele mai nei, aole ka hoole." Mat. 5: 17. "Nolaila, ua hemolele ke kanawai, a ua hemolele hoi, ua pono, ua maikai ke kauoha." Rom. 7: 12. "Oluolu no wau i ke kanawai o ke Akua, na ke kanaka oloko." Rom. 7: 22.
I. Aole anei hiki i ka poe haipule ke hana oi i ka mea kupono i ke ola o ko lakou uhane iho.
D. Aole loa; "Pela hoi oukou, aia pau i ka hanaia e oukou ka oukou mau mea a pau i kauohaia'i, e olelo oukou, he poe kauwa makou e waiwai ole aku ai." Luka 17: 10.
(Aole i pau.)
Waiawa, Nov. 25, 1842.
Auhea oe, e Nonanona eia; e ka mea hikiwawe i ka hai aku i keia mea hihia