Ka Nonanona, Volume II, Number 14, 6 December 1842 — Page 70

70 KA NONANONA. [DEKEMABA,

akaka ole, o ke Kahunakalai-waa, pii aku la a uka, ike aku la i ke koa opiopio, hanai aku la, ka! a kipulu aku la i ka weuweu malalo o kona kumu me ka ike ole ia e ka holona; eia ka pono e papohaku a puni ke kumu o ke koa; eia kekahi, e palaau a puni ke koa ma ke kumu, eia kekahi, e mahiai malalo o ke kumu i akaka ai ke koa hanai.
                Eia kekahi mea pono ole a'u i ike ai. O ke kikoni ma ke kumu o ke koa, oia kekahi hanai i ke koa; aole pela; he mea kapilipili wale no ia na oukou e Kahunakalai-waa a pau. E hana o akaka loa, i pono ai, aole e hihia ka holona. E kahunakalai-waa a pau mai Hawaii a Kauai, e pau keia mea kapilipili i ke koa, uluwale o ka nahelehele, e hana akaka i pilikia ole ka poe hooponopono. Ia KAHAU.

KA NONANONA.

Honolulu, Tusede, Dekemaba 6, 1842.

HAUNAELE HOU MA HONOLULUNEI.

                Akahi no ka haunaele pinepine o keia wahi, i ka po kekahi, i ke ao kekahi. No na haole no nae ka nui o ka hewa; inu rama lakou, alaila hele io ia nei me ka hikaka, a me ka walaau, a me ke kikeke i kela puka a i keia puka. Hakaka maoli kehahi mau haole Beritania ma ke alanui i ka la mua o Dek. nei, a kuikui no hoi a hina ilalo kekahi; a ua hooukuia lakou eha, paono na dala! Auwe keia kulanakauhale! Ke lanakila mai nei ka ino, a ua holo aku ka malu.
                No na makai kekahi hewa. Aole lakou makaala loa i ka po, e hopu i ka poe hoohaunaele; aole hoi lakou i kiai i na wahine holo i kai i na moku e hookamakama.
                No ka hale wela o Kinopu kekahi haunaele i kela po aku nei. Kani na pu a me na bele; a wawa loa na kanaka, Ue kinaiia no nae ke ahi, aole pau loa ka hale. No keia mau mea, aole pono loa ko makou hiamoe i ka po i keia wa.
                E ka poe pono, e ala kakou, a e hooikaika e kinai i keia ino: e hoohuli i ka poe inu rama, no ka mea, oia ke kumu nui o ka hewa.

MOKU MANUWA.

                I ka la Sabati nei, ku mai ma Honolulu ka moku manuwa, United States, ma ka olelo Hawaii, Amerikahuipuia; o Kapena Armstrong (oia hoi o Limaikaika) ke alii. Mai Kalifonia mai keia moku, he 11 la ma ka moana; ua kii mai i ka ai, e waiho ana maanei, a hoi koke aku no i Kalifonia. He moku nui keia, he frigate, elima haneri kanaka maluna iho.

PUALI INUWAI HAOLE MA LAHAINA.

                I ka la 18 o Novemaba nei, halawai kekahi mau haole ma Lahaina a kukulu ia puali inuwai. Umi a kumamawalu na haole hoohiki e haalele i na mea ona a pau, a e inu wai wale no. No na moku kekahi poe o lakou ekolu, a ekolu hoi o na haole ona pinepine ma Maui, a ua komo iloko o keia puali inu wai. Nani ka pono. Ua holo mua ko Maui i ko Oahu nei. Ahea la e hoomakaia keia hana maikai iwaena o na haole o Honolulu nei?

MAKE EMO OLE.

                Elua kanaka make koke me ka mai ole ma Honolulu nei i keia mau la. Hele kekahi iwaho o kona hale a hoi hou maloko, i aku la i kana wahine, "auhea la ka ipu baka?" Pane aku la ka wahine, "aia no ma ka moena;" haha iho la ke kane, aohe loaa, o ka haule no ia a lele aku ka hanu, o ka lua o laua he hoahanau ia, hele ia i ka halawai po alima ma Pauoa; pau ka halawai, hoi aku ia i ka hale, paina ahiahi, kamailio me kana wahine, i aku la, "olioli ka naau i ka lohe ana i ka ke Akua olelo i keia la." Moe ilalo ia ma kahi moe, a make koke iho. Aole uwe, aole olelo, aole oni ae. Ke ano no ia o keia ola ana, he pau koke; he mahu wale no. Aole akaka ka la a me ka hora e kiiia mai ai, e hele i ka hookolokola.
                Eia kekahi; Ua make kekahi wahine paahao i kela po aku nei iloko o ke awa o Honolulu nei, o Kunani kona inoa. He wahine moe kolohe ia, a holo malu oia i ka po a pii maluna o kekahi moku; ma ka hope o ka moku kona wahi e noho ai, nana ka ilio ia ia, uwe iho ia, ala mai la ke Kapena, no