Ka Nonanona, Volume II, Number 14, 6 December 1842 — Page 71

1842.] KA NONANONA. 71

kona lohe ana i ka leo o kana ilio, a nana aku he wahine. Ane aku la ia e hahau ia ia i ke kaula, a lele koke ka wahine iloko o ke kai, a make. Ua manaoia ua ku kona poo i kekahi mea oioi paha o ka moku, a hiki ole ia ia ke au iuka. Ua moku loa ka ili o kona poo, me he mea la ua hahauia i ka laau. I kakahiaka, ua loaa e lana ana ma ka hope o kekahi moku okohola.
                E ka poe hewa, e nana oukou i ka hopena o keia wahine. Pomaikai anei kona make ana? Noho anei ka poe moe kolohe ma ka poli o ke Akua? Aole loa. Aia ko lakou wahi ma ka po.
                Aole nae o keia wahine wale no, ka i holo maluna o na moku i ka po. He nui wale, a pehea na makai? Ua hiamoe anei lakou? Aole anei lakou i ae i keia hewa.

Elua kaikamahine make.
                Ma Lahaina kekahi; no Lowela, ka amara ia, a ua pilikia loa na makua i ka eha o ka naau.
                Ma Koloa kekahi, ua haule ia iloko o ka ipu hao baila ko, a pau koke kona ola! Aloha ino keia kaikamahine! He make weliweli loa kona.

NA KULA NUI MA AMERIKA.

                Na kula nui ma Amerika 109 kula nunui ma Amerikahuipuia, a ua hoi iwaho o ia mau kula na haumana he 30,000. Mai loko mai o kekahi kula nui malaila o Harvara kona inoa, aia no ma kahi kokoke ma Bosetona, ua loaa mai na haumana makaukau 6,000.

PUAA NUI.

                Ua kaluaia kekahi puaa ma Kune tekuta i kela makahiki aku, a ua kaupaonaia; 480 paona kona kaumaha, a ewalu malama wale no o ia puaa mai kona la hanau a hiki i kona la make. Pela anei na puaa ma Hawaii nei? Aole loa. Hanai ko Hawaii nei i ka puaa, alua, akolu, aha makahiki aole nae nui e like me keia. No ke aha la? No ka hanai naaupo no, a no ka poho ole o ka ai kekahi.

HE MEA HEWA.

                Eia ka hewa, o ke kii pinepine ana o na makua mea keiki ma Lahainaluna i ka lakou mau keiki e hoi, no ka mai, a me ka make paha. Penei ka olelo, "ua mai kou makuwahine, ua pilikia loa, e hoi oe e ike." Aloha ke keiki iloko o ke Kulanui, pilikia kona manao; kanalua kekahi manao, a aloha kekahi manao; a hoi aku ia e ike i kona makua mai, aole ka he mai! He mai uuku wale no, a ua ola. Nolaila poho keiki, a pono ole ka manao o na kumu.
                Pehea ka pono? Eia paha ka pono. Ina i mai kekahi, e kii ae i ke kumu misionari nana i hoouna ae i ke keiki i ke kula, a nana no e nana i ka nui o ka mai; a ua nui aku, pono ke hoi aku ke keiki, alaila, palapala aku ia i na kumu o Lahainaluna, a na lakou e hookuu aku i ke keiki e hoi a ike i ka mai. Oia paha ka mea e pono ai.

HALE PULE POPE.

                Ke hana mai nei na kamana i ka luakini Katolika ma Honolulu nei. Ua paa ke pili maluna, a ke hana ia nei maloko. He hale nui a me ka hanohano keia.

                Ka nui o na kanaka ma ka honua nei.

                                Kristiano            260,000,000
                                Na Iudaio               4,000,000
                                Na Mahometa     96,000,000
                                Na Pagana         500,000,000
                                Ka hui ana         860,000,000

HE NINAU MA KA HELU.

                Kuai mai nei o Mi. Bainamu ma Koloa i 12 kao, 5 bipi waiu, 2 kaulua bipi kauo, a me na lio 3, no na dala 795. Ua like ke kuaai ana o ka bipi waiu hookahi me na kao 6, ua like hoi ke kaulua bipi kauo hookahi me na bipi waiu 3, a o ka lio hookahi me na bipi kauo 3. Heaha kana i uku aku no kela mea keia mea o lakou a pau?