Ka Nonanona, Volume II, Number 15, 20 December 1842 — Page 76
76 KA NONANONA. [DEKEMABA,
HE WAHI NINAUHOIKE
no ka aoao pope.
(E nana i ka aoao 66.)
I. Heaha ka umikumamalima o ke kuhihewa o ka poe pope?
D. O ko lakou kuhihewa i ke ano o ko ke Akua hoapono ana i na kanaka.
I. Pehea ka lakou ao ana ma ia wahi?
D. Eia ka lakou i ao aku ai i na kanaka; E hooponoia kakou no ko kakou pono iho, oia hoi he pono hemolele loa iloko o kakou.
I. Heaha ka pono hemolele loa iloko i ko lakou manao?
D. O kekahi manawalea aku, oia ka lakou i kapa ai he pono hemolele loa iloko o ke kanaka.
I. Pehea ka manao o ka poe hoolepope ma ka hoaponoia?
D. Eia ko lakou manao; Ua hoapono wale ia mai ka poe manaoio, ma ka lokomaikai o ke Akua. Ua kapaia lakou he pono imua ona, no ka pono o Iesu Kristo wale no. He pono ia i haawi wale ia mai no lakou ma ko lakou
manaoio ana ia Iesu.
I. Pehea oe e hoike ai i ka oiaio o ia manao?
D. E akaka ka oiaio o keia manao ma keia mau pauku o ka palapala hemolele; "Ua hoapono wale ia mai ma kona lokomaikai, no ka hoola ana ma o Kristo Iesu la." Rom. 3: 24. "Aka, ua hoakaka mai ke Akua i kona aloha ia lakou, no ka mea, i ka wa e hewa ana kakou, make iho la o Kristo no kakou. Nolaila hoi ke hoaponoia mai nei kakou e kona koko, he oiaio no, e hoopakeleia mai kakou e ia i ka inaina." Rom. 5: 8, 9. "No ka mea, i ko lakou ike ole ana i ka hooponoia mai e ke Akua, a i ko lakou imi ana e hookupaa i ko lakou pono iho, aole lakou i noho aku mamuli o ka hoapono ana mai a ke Akua." Rom. 10:3. "I hoomaikaiia'i ka nani o kona aloha, ana i maliu mai ai ia kakou, no ka Mea aloha; Nana mai ke ola ia kakou ma kona koko, oia ke kalaia mai o na hala, e like me ka nui o kona lokomaikai. Ep. 1: 6, 7.
I. Heaha ka umikumamaono o ka hewa o ka poe pope?
D. O ko lakou hoomana ana i na kii.
I. Pehea ka manao o ka poe hoolepope?
D. Eia ko lakou manao; Aole loa pono e hana i kekahi kii i mea e hoohalike ai i ke Akua, aole pono e pule i kekahi kii; aole pono e lilo ke kii i mea kokua i ka kakou hoomana; aole pono e hoomana i kahi mea a ke Akua i hana'i. "E hoomana aku oe ia Iehova i kou Akua, a e malama aku oe ia ia wale no." Mat. 4: 10. "E ao oe, aole owau no kou hoakauwa, kekahi o kou hoahanau e hoike ana ia Iesu; e hoomana i ke Akua." Hoik. 19: 10.
I. Heaha ka umikumamahiku o ka hewa o ka poe pope?
D. O ka lakou pule ana ma ka olelo i ike ole ia.
I. Pehea ka olelo a ka poe hoolepope?
D. Eia ka lakou; Aole pono ka pule, iwaena o ke anaina kanaka, ma ka olelo i ike ole ia; aka, ma ka olelo maoli o ka aina, ka olelo akaka i na kanaka.
I. Heaha ke ano o ka pule.
D. O ka hai aku i ka hewa, o ke noi aku i ko ke Akua lokomaikai, o ka pule no hoi, a me ke aloha aku i ke Akua no kana mau hana maikai.
I. Nokeaha la aole pono kakou e pule ma ka olelo i ike ole ia?
D. No ka mea, aole ia he mea e pono ai. "E pono no e hanaia na mea a pau ma ka mea e naauao ai." Kor. I. 14: 26. "Pehea la e hiki ai i ka mea e noho ana ma ka naaupo, ke olelo ae, i kou hoomaikai ana aku, no ka mea, aole ia i lohe i ka mea au i olelo ai." Kor. I. 14: 16.
(Aole i pau.)
Eia no ma Honolulu nei Mi. Alekanekero a me ko ka hale ona, o Mi. Porebe a me ko ka hale ona, a me Mi. Hikikoke a me ko ka hale ona. He mai ko Alekanekero wahine, a me Porebe kane, a me Hikekoke wahine, a nolaila ko lakou holo ana mai maanei. Aole nae he mai pilikia loa, a ua manaoia kokoke maha. Eia no hoi o Emesona, a ua hoi aku nei o Baluina a me kana keiki.
NA LIMAIKAIKA e hoopuka'ku.