Ka Nonanona, Volume II, Number 16, 3 January 1843 — Page 77

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona
Buke 2. HONOLULU, OAHU, IANUARI 3, 1843. Pepa 16.

HE WAHI NINAUHOIKE NO KA AOAO POPE.
(E nana i ka aoao 76,)

                I. Heaha ka umikumamawalu o ka hewa o ka poe pope?
                D. O ko lakou kala ana i ka hewa, a me ko lakou haawi ana i palapala ae i ka hewa hou aku.
                I. Pehea ke ano o ka lakou kala ana i ka hewa?
                D. O ko lakou kala ana i ka hewa, oia ka hoole i ka ke Akua hoopai ana i ka mea hewa; hoole lakou no ka nui o ka pono i hoahuia, me he waiwai la, iloko o ka ekalesia o Roma.
                I. Pehea ka manao o ka poe hoole pope ma ia mea?
                D. Eia ko lakou manao; o ko ka poe pope kala ana i ka hewa, he mea hoopunipuni loa ia, he mea hoopailua loa hoi imua o Iesu Kristo a me ka poe pono a pau.
                I. Pehea oe e hoike ai ia wahi?
                D. Penei, 1. Aole loa e kalaia kekahi hewa ke ole ma ka lokomaikai o ke Akua, no ke koko o Iesu. "No ia mea, i hoaponoia mai kakou ma ka manaoio, he malu ko kakou me ke Akua, ma ko kakou Haku o Iesu Kristo." Roma 5: 1. "Nana mai ke ola ia kakou ma kona koko, oia ke kalaia mai o na hala, e like me ka nui o kona lokomaikai." Epeso 1: 7.
                2. Aole loa i hoikeia mai ma ka palapala hemolele, e hiki i ka pono o kekahi mea haipule ke kala aku i ko hai hewa. 3. O ko kanaka kala ana i ka hewa he mea hoino ia Iesu ia; no ka mea, he mana loa kona koko, aole hemahema; nolaila, aole pono ke hui pu ia ko kanaka pono me kana mohai; no ka mea, "Ma ka mohai hookahi hoi i hana'i oia i ka mea e pono mau ai ka poe nona ka huikala." Heb. 10: 14
                I. Heaha ka umikumamaiwa o ka hewa o ka poe pope?
                D. O ko lakou papa ana i ka mare o na kahuna pule.
                I. Pehea ka manao o ka poe pope i ka mare ana?
                D. Aole lakou i hookapu i na mare a pau; aka, olelo hoowahawaha lakou i ka mare ana, me he mea ino la.
                I. Pehea ka poe hoole pope ma keia mea?
                D. Eia ko lakou manao i ko ka poe pope hookapu ana i ka mare; he mea hewa loa ia, no ka diabolo mai.
                I. Pehea ka hoakaka ana ia wahi?
                D. Penei; 1. Ua haawiia mai ka mare, e ke Akua, ma ka palapala hemolele. Ua kapaia he mea maikai no kanaka a pau. Aole loa i hookapuia malaila ka mare ana o na kahuna pule. 1 Kor. 7: 2. "Aka, o moe kolohe auanei, ua pono no i kela kane i keia kane, kana wahine iho."—1 Kor. 9: 5. "Aole anei e pono ia makou (ia Paulo ma) ke kono mai i kaikuwahine, a i wahine na makou, e like me kekahi o na lunaolelo, a me na kaikuaana o ka Haku a me Kepa?" 1 Tim. 3: 2. "Eia ka pono no ke kahuna pule, he hala ole, e kane ana ia na ka wahine hookahi." Tito 1: 6. "Ina