Ka Nonanona, Volume II, Number 17, 17 January 1843 — Page 82
82 KA NONANONA. [IANUARI,
SILIKA. HELU 3.
I ka makahiki 1839, hoolimalima o Kale me ke Alii i kekahi aina o Puhaunui ma Hanalei i Kauai. He aina momona loa ia, ulu wale na mea kanu, ua malu hoi i ka makani, he wahi lulu. Loaa koke ia ia na ilima, mai Koloa mai, a kanu iho la. He iwakalua paha ekere i kanuia a puni i na ilima. Aole okanamai ke kupu ana! emo ole! Ua paa i ke kukuluia na hale e pono ai ka hana. Elua hale hanai enuhe, 256 kapuai ka loa o kekahi hale, a he 22 kapuai kona laula. Iloko o keia hale ekolu mau lalani holopapa e moe ana ma ka loa, me he mau hikiee la i pawalu ia e kau ana kekahi maluna o kekahi, a o ke kapuai hookahi paha ke kowa mawaena o na holopapa. I helu pakahi ia na holopapa he 24 lakou e moe ana ma ka loa o ka hale, a eha kapuai ka palahalaha o na holopapa. Ua haliiia keia mau holopapa i na moena, a malaila ua hanaiia na enuhe; malaila hoi lakou e milo ai i na popo silika. Ai no na enuhe i na lau ilima i na la he 25 paha, alaila milo lakou i na popo silika, nolaila ua hanaiia kekahi hanauna i ka malama hookahi; a ua lawa keia hale e hanaiia ai na enuhe hookahi miliona i ka manawa hookahi. O ka lua o na hale hanai enuhe, he hale maikai no ia; 50 kapuai kona loa a 20 kona laula, malaila na lalani holopapa ekolu e moe pawalu ana ma ka loa, kekahi maluna o kekahi e like me na holopapa ma ka hale mua i olelo ia ai. Ma keia hale ua hanaiia na enuhe i ko lakou wa opio, a nui ae, ua haliia i kela hale nui. He mau holoholona pakela ai na enuhe: o ka ai mau aku ko lakou makemake. Kakaikahi na hora a lakou e hoomaha ai, i ka wa wale no e pilikia ai lakou i ko lakou ili iho no ka ulu ana o ke kino, a hoolei lakou i ka ili, ai hou aku no. Eha o lakou mau ili i hoolei ai mai ka wa opio a oo, alaila milo. No ko lakou pakela ai ana, ua hanai pinepine ia i kela hora i keia hora, ua hanaiia i ke ao a i ka po. Ai hopohopo alulu nakaki mai la lakou.
KA NONANONA.
Honolulu, Tusede, Ianuari 17, 1843.
NA MEA HOU.
Ua hooliloia o Wilama Pete i lunaawa no Honolulu nei, a nana hoi e ohi i ka uku o na moku, a e hana i na oinana a pau a ka luna awa.
Eia kekahi; ua hooliloia o A. Adams, (Alika) i Pilota no Honolulu nei, a o Ioane Miki kona lua; ua hemo o Ranai.
Eia kekahi; ua hooliloia o Pipali i lunaawa no Lahaina, a ua hooliloia no hoi o Isaaka Luis i Pilota malaila.
HAOLE KUAI RAMA.
I keia mau la iho nei, ua hooukuia o Kupa, he haole kuai rama ma Honolulu nei, i kanalima dala, no kona kuai liilii ana i ka rama me ke ku e i ke kanawai. He mea pono loa keia, e maluhia ai keia wahi. He nui na haole kuai liilii i ka rama, aole nae i ikeia ko lakou kuai ana e na makai; akahi no a loaa maopopo ka mea kuai rama.
MAUI.
LAHAINA. Malaila no o Mi. Holo laua o Kauka i keia mau la a hoi mai nei. I mai laua, ua maikai ka ahaaina makahiki a ke alii. Aole mea ona ma ka papa aina; he wai ka mea inu, a ua inu aloha lakou ma ka wai; pau loa ke kiaha okoa i ka inu hookahi ana! Auwe! nani ko lakou ono i ka wai huihui! Me he hue wai maoli la paha ko lakou opu.
WAILUKU. Ua hoolaaia ka luakini hou malaila i ka la Sabati hope o Dek, 1842, a ke pule hoomau ko lakou malaila ia mau la. Ua oleloia, ua makaala na hoahanau a me na kanaka malailai i ko ka uhane. O ke Akua kekahi me lakou. Ua maikai ke Kula kaikamahine malaila i keia wa; mahalo Mi. Holo ia ia.
LOHE HOU.
I keia mau la iho nei, ku mai kekahi moku kia kolu, o Sara Abigal ka inoa, mai Mazetlan mai, a ua lawe mai i na palapala