Ka Nonanona, Volume II, Number 17, 17 January 1843 — Page 83
1843.] KA NONANONA 83
he lehulehu mai Amerika mai, a eia na mea hou a makou i lohe ai ma ua mau palapala la.
E holo koke mai ana kekahi kiakolu o Bearing kona inoa i keia pae aina. No Hanere ma ia moku, a o ka la 10 o Nov. 1842, oia ka la e holo mai ai mai Bosetona mai. Aole akaka loa ka poe e holo mai ana, ua oleloia no nae, o Casela a me kana wahine hou, o Kahina a me kana wahine, ka wahine a Kap. Dominis a me kana keiki; o Iohnson ka mea noho iloko o ka hale kuai o Mi. Berua mamua, a o na wahine kane ole elua, o Miss Dole, a me Miss. Ladd. Aole nae akaka loa keia poe e holo mai ana ma ua moku nei.
Aole makou i lohe o Binamu ma kekahi e hoi mai ana.
Eia kekahi lohe, ua make ka makahiapo o ke alii nui o Farani, o kona hooilina nona ke aupuni ke make kona makuakane. O ka haule ana mawaho o ke kaa holo lio, kona mea e make ai; puiwa na lio a holo, a haule ke alii. He nui ka uwe a me ke kanikau ma Farani no keia make. Ua lilo ka hooilina i ka moopuna o ke alii nui, o Pilipi hoi, i keia wa.
KANIKELE AMERIKA. Ke lohe nei makou, ua holo aku ia i Beritania a me Farani; aia ma Farani ma Parisa, i ka malama o Iulai 1842, a me Augate, a iloko o Okakoba e hoi hou ana i Amerikahuipuia, e kuai i moku, alaila hoi koke mai i Hawaii nei.
KA MAKE ANA O PAAHANA.
Ua make o Robata Paahana ma Koloa i ka la mua o Ianuari nei; o ka hui kona mai, a me ka pehu malalo, a me ka paa o ka wai. Aloha ino ia! he hoahanau aloha ia! Ua holo aku i Kauai i kekahi hana, a kahea koke mai ke Akua ia ia e hele imua ona i ka hookolokolo! He lunakanawai, a he luna ekalesia o Paahana ma Honolulu nei; he kanaka koikoi no ia iwaena o makou; aka hoi, ua hakahaka kona wahi; a ua pau kana hana.
Holo aku o Ana, kana wahine e ike ia ia ma Koloa, a ua make e, a ua nalo e paha ke kupapau. He oiaio maoli kela olelo, "i ka hora aole oukou i manao ai e hele mai ke keiki a ke kanaka."
PULE HOOMAU.
He pule hoomau ko ka ekalesia mua ma Honolulu i keia mau la iho nei, mai ka la 4 o Ianuari nei a hiki i ka la 8. Ua piha loa ka hale pule ma Kawaiahao i na kanaka i kela mau la, a ua hoolohe maikai lakou i na olelo. Ua hele lokomaikai mai kekahi mau kumu hai ola e kokua i keia hana; eia ko lakou mau inoa, o Alekanekero, o Hikikoke, a me Pareka, a ua hooikaika pu makou me ka haipule nui, a me ka oluolu loa ia mau la.
Eia na pooolelo i hoikeia'ku
Haiao 1. Iakobo. 5: 16. O ka pule ikaika a ke kanaka pono e lanakila nui ia. Na LIMAIKAIKA.
Haiao 2. Oihana 10: 33. Eia hoi makou a pau loa imua i ke alo o ke Akua e hoolohe i na mea a pau i kauohaia mai ai e oe e ke Akua. Na HIKIKOKE.
Haiao 3. Mat. 18: 1. A ua hele mai nei ke Keiki a ke kanaka e hoola i ka mea i auwana. Na PAREKA.
Haiao 4. Kekahuna 9: 10. O na mea a pau i loaa mai i kou lima e hana'i e hana oe me kou ikaika; no ka mea, ma ka luakupapau kahi au e hele aku ai, aole hana, aole noonoo, aole ike, aole manao. Na ALEKANEKERO.
Haiao 5. Ier. 13: 23. E hiki anei i ko Aitiopa ke hoano e i kona ili, a me ka leopadi i kona mau kiko? Alaila oukou ka poe maa i ka hana hewa, e hiki ai ke hana maikai. Na HIKIKOKE.
Haiao 6. Heb. 9: 27. A ua hoomaopopoia ka make hookahi ana o na kanaka, a ma ia hope aku ka hoopai ana. Na PAREKA.
Haiao 7. Na'lii 18: 21. Pehea la ka loihi o ko oukou kapekepeke ana iwaena o na manao elua? Na PAREKA.
Haiao Heb. 12: 27. Ua ike oukou i kona makemake ana mahope iho, e loaa ia ia ka hoomaikaiia, ua hooleia oia, aole hoi i loaa ia ia kahi e lohe hou mai ai, ua imi aku no nae oia ia mea me ka waimaka. Na LIMAIKAIKA.
Haiao 9. Sol. 29: 1. O ka mea i ao pinepineia a hooolea i kona ai, e make koke no ia, aole mea e ola'i. Na KUKE.
Ma ka lohe ana i keia mau haiao, komo ka makau iloko o kekahi poe; haalulu kekahi poe hoahanau a huli mai kekahi poe auwana, a i ka nana'ku, ua make pono keia hooikaika ana. Aia no nae i ka la mahope,