Ka Nonanona, Volume II, Number 17, 17 January 1843 — Page 84

84 KA NONANONA. [IANUARI,

ike kakou i ka hua o keia hana. Ua huli mai kekahi poe pope i keia mau la.

MOKU HOU.

                Ke kapili nei kekahi moku ma Mahinauli i Kauai nei, o Kimolale ke Kamana nana e kapili nei, o Puniai ka mea nona ka moku.
                Eia na kapuai o ka loa o ka iwikaele a me ka loa o luna, a me ka laula, a me ke kiekie: He 60 kapuai ka loa o ka iwikaele, he 68 kapuai ka loa o luna, he 18 kapuai ka laula, he 9 kapuai ke kiekie. Na KAPEHE.
Waimea, De. 3, 1842.

HE HANA MANAWALEA.

Honolulu, Ianuari 10, 1842.
                Auhea oe e Limaikaika. Pono ia oe ke hoike aku ma ka Nonanona i ka hana lokomaikai o na kanaka ma ka ekalesia 2, o Honolulu i hana iho nei. Ua makana wale mai lakou no ka luakini hou ma Kaluaaha i na dala he kanawalu. Ma keia lokomaikai o lakou, ua kalaia kekahi pilikia o ko lakou poe hoahanau ma Molokai. A ke hai aku nei au i kuu aloha ia lakou no keia kokua maikai, a ke pule nei au i ke Akua nona ka waiwai a pau e hooko maoli mai maluna o lakou i kana i olelo mai ai, "O ka mea manawalea aku e momona ia." Na'u na HIKIKOKE.

O KA MEA HANA-WATI A ME KA WATI;

He nane keia e maopopo ai ka ino o ka hookamani.

                He nui na wati nani a maikai iloko o ka hale o kekahi mea hana wati; a no ka nani loa o kekahi wati olaila, haele ae na kanaka a pau a komo aku malaila e nana aku ia ia
                "Ea, he wati maikai anei keia?" wahi a kekahi wahine hoihoi i ka mea hana wati "ke imi nei au i wati maikai io, a ina ua like ko ia nei maikai oloko me kona nani, ina ua kupono loa ia'u."
                I mai la ka mea hana-wati, "ke minamina nei au i kuu hiki ole, ke hoomaikai aku ia ia. Aole o'u makemake e hoopunipuni i ka poe i hele mai nei e kuai, a nolaila kuu hiki ole ke kuai lilo aku i ua witi nei. Aole au i ike i ka wati nani i oi aku ia ia, aka, he hookamani kona; no ka mea, he oiaio, aole ona kani."
                Ke ao mai la keia nane ia kakou, aole e manao ma ko waho. Aia no kekahi poe kanaka, he maikai kowaho, me ka naau ino a hoopunipuni iloko. He lapuwale keia poe e like me kela wati i olelo ia, a e wahawahaia mai lakou; aka, he alohaia, a he pomaikai kekahi poe e ae i emi iho ka maikai o ko lakou helehelena owaho, ke maikai lakou oloko.

                Hookahi keiki a kekahi kanaka, a ua malama loa oia i kana keiki, a hoawi lokomaikai ia ia i na mea a pau i loaa mai ia ia. A nui ae ua keiki nei, a noho hale iho la, hana lokoino aku la i kona makua elemakule; kipaku aku la, aole i hanai pono aku. Olelo aku la ka elemakule i kona moopuna ia Taomi, "e kii aku oe i ko'u aahu, i hele au a noho ma ke alanui e noi wale aku." Uwe iho la ke keiki, a kii aku la no. Halawai pu me kona makuakane, i aku la ia ia, "ke pii aku nei au i ka aahu o kuu kupunakane, i hoaahu oia ia ia iho a hele aku e noi wale." Kii aku la o Taomi i ka aahu, a lawe mai la i kona makuakane, i aku la, "e ka makua, eia ko'u manao ia oe, e mahele oe i keia aahu mawaenakonu, ua lawa kekahi apana no kuu kupuna; e mlama oe i kekahi apana nou i paa kanaka makua wau, e kipaku aku paha au ia oe."
                Ku iho la ka olelo o keia keiki iloko o kona makuakane; holo aku la i kona makua i hoinoia ai, a noi aku ia ia e kala mai ia ia, a ma ia hope iho hana oluolu a lokomaikai ia ia a hiki i kona wa i make ai.

NA LIMAIKAIKA e hoopuka'ku.